by Suryaa Desk | Sun, May 25, 2025, 10:56 PM

టమాట లేకుండా మన ఇళ్లలో వంటలు వండటం చాలా అరుదు. ఏ కూర చేసినా సరే. అందులో ఒకటో రెండో టమాటాలు తప్పనిసరిగా వేస్తారు. అంతగా వాటికి అలవాటు పడిపోయాం. అయితే..ఇలా కేవలం కూరల్లోనే కాదు. వేరే విధంగా తీసుకున్నా టమాటాతో ఎన్నో ప్రయోజనాలు కలుగుతాయి. అందులో ఉండే పోషకాలు ఆరోగ్యాన్ని అందిస్తాయి. అయితే..షుగర్ తగ్గించడంలోనూ టమాటా చాలా బాగా పని చేస్తుందని చెబుతున్నారు నేచురోపతి ఎక్స్ పర్ట్. సరైన విధంగా తీసుకుంటే చాలా తక్కువ రోజుల్లోనే డయాబెటిస్ కంట్రోల్ అవుతుందని, షుగర్ బార్డర్ లో ఉన్న వారికీ ఇది మంచి ఔషధం అని వివరించారు.

ఇందులో పుష్కలంగా యాంటీ ఆక్సిడెంట్స్ ఉంటాయి. వీటితో పాటు విటమిన్స్, మినరల్స్, ఫైబర్ ఉంటాయి. వీటన్నింటితో పాటు షుగర్ ని తగ్గించే గుణాలు టమాటాలో ఉండడం వల్ల డయాబెటిక్ పేషెంట్స్ ఇది రెగ్యులర్ గా తీసుకోవాలని సూచిస్తున్నారు నేచురోపతి ఎక్స్ పర్ట్. అయితే..షుగర్ కంట్రోల్ కావాలంటే టమాటాని ఎలా వాడాలో కూడా వివరించారు. ఈ ఎక్స్ పర్ట్ చెప్పినట్టుగా తయారు చేసుకుని తాగితే షుగర్ కంట్రోల్ లోకి వచ్చేస్తుంది.

టమాటా జ్యూస్

సాధారణంగా టమాటాలను మనం కూరల్లో వేసి తినేస్తుంటాం. కానీ..షుగర్ తగ్గాలంటే మాత్రం ఇలా కాదు. నేరుగా జ్యూస్ రూపంలోనే తీసుకోవాలి. జ్యూస్ అంటే..నేరుగా టమాటాలను కట్ చేసి మిక్సీ పట్టి తాగేయడం కాకుండా ఓ స్పెషల్ రెసిపీ చెప్పారు నేచురోపతి ఎక్స్ పర్ట్. ఎన్నో రోజులుగా షుగర్ లెవెల్స్ కంట్రోల్ అవ్వక ఇబ్బందులు పడుతున్న వాళ్లు ఇప్పుడు చెప్పిన విధంగా టమాటా జ్యూస్ చేసుకుని రెగ్యులర్ గా తాగితే చాలా తొందర్లోనే ఫలితాలు కనిపిస్తాయి. అయితే..జ్యూస్ చేసుకునే క్రమంలో మాత్రం కొన్ని టిప్స్ కచ్చితంగా ఫాలో అవ్వాల్సి ఉంటుంది.

ఎలా తయారు చేసుకోవాలి

ముందుగా మూడు టమాటాలు తీసుకోవాలి. వాటిని బాగా శుభ్రం చేయాలి. గిన్నెలో నీళ్లు పోసి ఈ మూడు టమాటాలు అందులో వేయాలి. అవి మెత్తగా అయ్యేంత వరకూ ఉడికించాలి. ఆ తరవాత టమాటాపై ఉండే పొట్టుని తొలగించాలి. ఈ సమయంలోనే మరో పని కూడా చేయాలి. టమాటాలో ఉండే గింజల్ని పూర్తిగా తీసేయాలి. చెంచాతో వీటిని తొలగించాలి. ఆ తరవాత ఉడికిన టమాటాలను బాగా గ్రైండ్ చేసుకోవాలి. తాగేందుకు అనువుగా ఉండేలా జ్యూస్ లా చేయాలి.

ఎప్పుడు తాగాలి

ఇప్పుడు తయారు చేసుకున్న జ్యూస్ లో కాస్తంత పిప్పి ఉంటుంది. ముందుగా ఈ పల్ప్ ని ఫిల్టర్ చేసుకోవాలి. ఆ తరవాతే అది తాగడానికీ రెడీ అయిపోతుంది. ఇలా రెగ్యులర్ గా తయారు చేసుకుని కనీసం 90 రోజుల పాటు తాగాలి. అయితే ఎప్పుడు పడితే అప్పుడు తాగితే పెద్దగా ప్రయోజనం ఉండదు. సరిగ్గా మీరు భోజనం చేయడానికి ఓ పావుగంట ముందు జ్యూస్ తీసుకోవాలి. మూడు నెలల పాటు ఇది కంటిన్యూ చేస్తే షుగర్ లెవెల్స్ చాలా వరకూ కంట్రోల్ అయిపోతాయి. భోజనం ముందే ఈ జ్యూస్ తీసుకోవడం వల్ల రక్తంలో చక్కెర పెరగకుండా అడ్డుకుంటుంది. తద్వారా షుగర్ లెవెల్స్ ఎప్పుడూ నార్మల్ రేంజ్ లోనే ఉంటాయి.

ఇలా కూడా చేసుకోవచ్చు

టమాటాలను ఉడకబెట్టి జ్యూస్ చేసుకోవడం ఓ పద్ధతి. అయితే..ఇలా బాయిల్ చేయకున్నా నేరుగా కూడా తీసుకోవచ్చు. రెండు టమాటాలను కట్ చేసుకోవాలి. అందులో ఉన్న గింజలను పూర్తిగా తొలగించాలి. ఆ తరవాత ఆ ముక్కలను మిక్సీలో వేసుకుని బాగా గ్రైండ్ చేయాలి. తరవాత పల్ప్ ని ఫిల్టర్ చేయాలి. అందులో కొన్ని నీళ్లు పోసి బాగా మిక్స్ చేయాలి. ఈ జ్యూస్ ని మూడు నెలల పాటు రోజూ ఉదయం తీసుకుంటే షుగర్ లెవెల్స్ తగ్గిపోతాయి.

టమాటాతో ఎన్నో లాభాలు

టమాటాలో యాంటీ ఆక్సిడెంట్స్ అధికంగా ఉంటాయి. ఇవి శరీరంలోని టాక్సిన్స్ ని బయటకు పంపేస్తాయి. దీంతో పాటు విటమిన్ సి, విటమిన్ ఎ ఉంటాయి. విటమిన్ ఎ కంటి చూపుని మెరుగు పరుస్తుంది. విటమిన్ సి రోగనిరోధక శక్తిని పెంచుతుంది. చర్మ ఆరోగ్యాన్ని కూడా కాపాడుతుంది. అందుకే..టమాటా జ్యూస్ ని ముఖానికి అప్లై చేసుకుంటే మంచిదని బ్యూటీ ఎక్స్ పర్ట్స్ చెబుతుంటారు.

ఇందులో ఉండే లైకోపీన్ బాడీని ఫ్రీ రాడికల్స్ నుంచి రక్షిస్తుంది. పైగా ఫైబర్, పొటాషియ ఉండడం వల్ల జీర్ణ శక్తి మెరుగు పడడంతో పాటు గుండె కూడా ఆరోగ్యంగా ఉంటుంది. టమాటాల్లో కేలరీలు చాలా తక్కువగా ఉంటాయి. అందుకే చాలా మంది వెజిటబుల్ సలాడ్స్ లో వీటిని చేర్చుకుంటారు. బరువు తగ్గాలనుకునే వాళ్లు టమాటాలు తీసుకుంటే ఆహారం సులువుగా జీర్ణం అవడంతో పాటు త్వరగా వెయిట్ లాస్ అవుతారు.