by Suryaa Desk | Sun, May 25, 2025, 10:51 PM

అనుకోకుండా చేయి కట్ అయినప్పుడు, ఏదైనా తగిలి రక్తం వచ్చినప్పుడు వెంటనే పసుపు పెట్టేస్తారు పెద్ద వాళ్లు. అందులో ఉండే యాంటీ బయాటిక్ గుణం గాయం త్వరగా మానేలా చేస్తుంది. అంతే కాదు. ఇందులో యాంటీ బ్యాక్టీరియల్ ప్రాపర్టీస్ కూడా ఉంటాయి. పసుపుని వంటల్లోనే కాకుండా వేరే రకంగా కూడా తీసుకోవచ్చు. పాలు, నీళ్లలో కలుపుకుని తాగొచ్చు. అయితే..పసుపుని వాడే విషయంలో కొన్ని తప్పులు చేస్తున్నామని అంటోంది ఆయుర్వేదం. సరైన విధంగా ఎలా వాడాలో వివరించింది.

రోజూ వాడే పదార్థం

పసుపు రెగ్యులర్ గా వాడే పదార్థమే. ముఖ్యంగా వంటల్లో కచ్చితంగా వాడతారు. కేవలం రంగు కోసమే కాదు. ఇందులో ఉండే ఔషధ గుణాలు సులువుగా జీర్ణం అయ్యేలా చేస్తాయి. దీంతో పాటు మరి కొన్ని ఆరోగ్య ప్రయోజనాలు కూడా ఉంటాయి. అందుకే వంటల్లో పసుపు వేయడం అనేది మనకు అలవాటైపోయింది. పాలు తాగినా అందులో చిటికెడు పసుపు వేసుకుంటారు. అయితే..ఇలా వాడడం మంచిదే అయినా కొన్ని పొరపాట్లను సరిదిద్దుకుంటే పసుపుతో కలిగే ప్రయోజనాలు పదింతలు ఎక్కువగా అందుతాయని అంటోంది ఆయుర్వేదం. అవేంటే చూద్దాం.

వేడి చేయాలి

పసుపులో కర్ క్యుమిన్ అనే పదార్థం ఉంటుంది. ఇందులో ఇన్ని ఔషధ గుణాలుండడానికి ఇదే ముఖ్య కారణం. అయితే..ఈ పదార్థంతో శరీరానికి ఎంతో మంచి జరుగుతుంది. లోపలి మలినాలు తొలగిపోతాయి. అయితే.. పసుపుని నేరుగా వాడకూడదు అంటోంది ఆయుర్వేదం. పసుపుని కాస్తంత వేడి చేయాలి. అలా చేయడం వల్ల కర్ క్యుమిన్ ఎక్కువ మొత్తంలో విడుదలవుతుంది. అంతే కాదు. ఊరికే కాకుండా నెయ్యి లేదా నూనెలో వేసి వేడి చేసిన తరవాత వాడుకోవాలి. వంటల్లో వాడే ముందు ఇలా చేస్తే రెట్టింపు ప్రయోజనాలు ఉంటాయి.

నల్ల మిరియాలతో

​నల్ల మిరియాల్లో పైప్ రైన్ అనే పదార్థం ఉంటుంది. ఇది ఆరోగ్యానికి చాలా మంచిది. ముఖ్యంగా కఫాన్ని తగ్గించడంలో బాగా పని చేస్తుంది. అయితే..పసుపుతో పాటు నల్ల మిరియాలు తీసుకుంటే ఎక్కువ లాభం ఉంటుంది. పసుపులో ఉండే కర్ క్యుమిన్ శరీరానికి అందేలా నల్ల మిరియాలు తోడ్పడతాయి. కేవలం చిటికెడు మిరియాలు వేసుకుంటే చాలు. పసుపులో ఉండే ఔషధ గుణాలు వెయ్యి రెట్లు పెరుగుతాయి.

అందరికీ సరికాదు

పసుపు ఆరోగ్యానికి మంచిదే. ఇది అందరికీ తెలిసిన విషయమే. కానీ..కొందరికి ఇది ఏ మాత్రం మంచిది కాదు. ఆయుర్వేదం ప్రకారం..ఇందులో ఉష్ణగుణం ఎక్కువగా ఉంటుంది. పిత్తదోషం ఎక్కువగా ఉండే శరీరాలకు పసుపు మంచిది కాదు. వీళ్లు పసుపు ఎక్కువగా వాడడం వల్ల వేడి మరింత పెరిగిపోతుంది. దీని వల్ల అనవసరమైన సమస్యలు తలెత్తుతాయి. అందుకే..వీళ్లు పొరపాటున కూడా పసుపు వాడకూడదు.

క్వాలిటీ చెక్ చేసుకోండి

పచ్చగా కనిపించేదంతా పసుపు కాదు. ఇందులోనూ కల్తీ వస్తోంది. రకరకాల కెమికల్స్ యాడ్ చేసి పసుపుని తయారు చేస్తున్నారు. దీన్ని వాడడం వల్ల ఉన్న సమస్యలు తగ్గకపోగా కొత్త సమస్యలు వస్తాయి. అందుకే..ఆర్గానిక్ పసుపుని మాత్రమే వాడాలి. కెమికల్స్ తో తయారు చేసే పసుపులో కర్ క్యుమిన్ కంపౌండ్ చాలా తక్కువగా ఉంటుంది. ఈ పసుపుని వాడడం వల్ల శరీరానికి ఎలాంటి ప్రయోజనమూ ఉండదు. పసుపు క్వాలిటీని చెక్ చేసుకోడానికి ఓ సారి వాసన చూడాలి. దాన్ని బట్టే తెలుస్తుంది.

వేరే వాటితో కలిపి తాగడం

ఎప్పుడైనా సరే. పసుపుని నేరుగా తీసుకోకూడదు. దీని వల్ల అందులో ఉండే ఔషధ గుణాలు సరైన విధంగా శరీరానికి అందవు. అందుకే..వేరే వాటితో కలిపి తీసుకోవాలి. ఉదాహరణకు జలుబు వచ్చినప్పుడు గోరు వెచ్చని పాలలో కలిపి తీసుకోవాలి. విపరీతంగా దగ్గు వస్తే తేనె లేదా నెయ్యిలో కలుపుకుని తినాలి. ఇలా చేయడం వల్ల కఫం తగ్గిపోతుంది. ఛాతిలో మంట, గొంతు నొప్పి త్వరగా తగ్గిపోతాయి. గోరు వెచ్చని నీళ్లలోనూ కలుపుకుని తాగితే జీర్ణ శక్తి పెరుగుతుంది.

మరీ అతిగా వాడొద్దు

పసుపు వాడకం మంచిదే అయినా మరీ అతిగా వాడకూడదు. ముఖ్యంగా పాలు లేదా నీళ్లలో వేసుకుని తాగినప్పుడు పసుపు ఎక్కువైతే రుచి మారిపోతుంది. ఎప్పుడైనా సరే ఓ టేబుల్ స్పూన్ పసుపు కన్నా ఎక్కువగా వాడకూడదు. ఓ కప్పు గోరు వెచ్చని పాలు లేదా నీళ్లలో టేబుల్ స్పూన్ పసుపు వేసుకుంటే సరిపోతుంది. ఇంతకు మించి వాడితే నోరంతా చేదుగా మారుతుంది. పసుపు అంటేనే వెగటు పుట్టేలా చేస్తుంది.

తేనె కలుపుకోండి

పసుపు రుచి మరీ ఇబ్బందిగా అనిపిస్తే అందులో ఓ టేబుల్ స్పూన్ తేనె కలుపుకోండి. ఈ రెండింటినీ కలపడం వల్ల ఎలాంటి ఇబ్బంది ఉండదు. పసుపులో ఔషధ గుణాలు కూడా ఎక్కడికీ పోవు. పైగా రుచి కాస్త తీపిగా ఉంటుంది కాబట్టి సులువుగా తీసుకుంటారు. మిరియాలతో పాటు దాల్చిన చెక్క, అల్లం లాంటి వాటితోనూ కలిపి తీసుకోవచ్చు. వీటితో మరింత ఆరోగ్యం పొందవచ్చు. ఈ చిట్కాలు పాటిస్తూ సరైన విధంగా పసుపుని వాడితే అందులో ఉండే ఔషధ గుణాలు సరిగ్గా అందుతాయి.