by Suryaa Desk | Sun, May 25, 2025, 07:28 PM

బంగ్లాదేశ్ రాజకీయాల్లో కీలక పరిణామాలు చోటు చేసుకుంటున్నాయి. బంగ్లాదేశ్ తాత్కాలిక ప్రభుత్వ అధినేత మహమ్మద్ యూనస్‌కు, ఆ దేశ ఆర్మీ చీఫ్ వకార్ ఉజ్ జమాన్‌కు మధ్య విభేదాలు తీవ్ర స్థాయికి చేరుకున్నట్లు వార్తలు వచ్చాయి. అంతేకాకుండా మహమ్మద్ యూనస్‌ రాజీనామా చేస్తారనే ఊహాగానాలు కూడా వెల్లువెత్తాయి. బంగ్లాదేశ్ ప్రభుత్వ ఏర్పాటులో భాగమైన రాజకీయ పార్టీలు కలిసి ఉండకపోతే తాను ఆ పదవిలో కొనసాగలేనని మహమ్మద్ యూనస్ చెప్పినట్లు కొందరు నేతలు బహిరంగంగా వెల్లడించడంతో మహమ్మద్ యూనస్ రాజీనామా ఖాయమేననే వార్తలు వచ్చాయి. అయితే ఈ విషయంపై తీవ్ర గందరగోళం నెలకొనగా.. తాజాగా ఒక క్లారిటీ వచ్చింది. మహమ్మద్ యూనస్ మంత్రివర్గ సలహాదారు వహీదుద్దీన్ మహమూద్.. అవన్నీ అసత్య ప్రచారాలేనని కొట్టిపారేశారు. బంగ్లాదేశ్ తాత్కాలిక ప్రభుత్వాధినేతగా మహమ్మద్ యూనస్ కొనసాగుతారని ఆయన తేల్చి చెప్పారు.

బంగ్లాదేశ్‌లో నెలకొంటున్న తీవ్ర ఉద్రిక్త పరిస్థితులకు భయపడి రాజీనామా చేస్తానని మహమ్మద్ యూనస్ చెప్పలేదని వహీదుద్దీన్ మహమూద్ స్పష్టం చేశారు. అయితే ప్రభుత్వానికి కేటాయించిన బాధ్యతలను నిర్వర్తించడంలో అనేక అడ్డంకులు ఎదురవుతున్నప్పటికీ.. వాటన్నింటినీ అధిగమించేందుకు ప్రయత్నిస్తున్నామని వెల్లడించారు. మహమ్మద్ యూనస్ దాదాపు 19 మంది సలహాదారులు, మంత్రులు, ఇతర అధికారులతో అత్యవసర సమావేశం నిర్వహించిన తర్వాత వహీదుద్దీన్ మహమూద్ ఈ వ్యాఖ్యలు చేయడం గమనార్హం. దీంతో మహమ్మద్ యూనస్ రాజీనామా చేయడం లేదని అర్థం అవుతోంది.

అయితే బంగ్లాదేశ్ తాత్కాలిక ప్రభుత్వానికి అప్పగించిన బాధ్యత ఎంతో ముఖ్యమైందని.. దాన్ని తాము మధ్యలో వదులుకోలేమని వహీదుద్దీన్ మహమూద్ స్పష్టం చేశారు. ప్రభుత్వ సలహాదారులు కూడా ఎక్కడికీ వెళ్లడంలేదని తేల్చి చెప్పారు. దేశ భద్రత, భవిష్యత్తు కోసం బంగ్లాదేశ్ ప్రజల డిమాండ్లను తీర్చేందుకు ప్రభుత్వానికి అధికారులు అందరూ సహకరించాలని చర్చల్లో మహమ్మద్ యూనస్ కోరినట్లు వహీదుద్దీన్ తెలిపారు.

కానీ నేషనల్ సిటిజన్ పార్టీ (ఎన్‌సీపీ) చీఫ్ నహిద్ ఇస్లాం.. శుక్రవారం చేసిన వ్యాఖ్యలు అసలు వివాదానికి కారణం అయ్యాయి. మహమ్మూద్ యూనస్ రాజీనామా గురించి నహిద్ ఇస్లాం మాట్లాడటంతో ఈ ఊహాగానాలు వెల్లువెత్తాయి. మహమ్మద్ యూనస్ రాజీనామా గురించి వచ్చిన వార్తలు విన్నానని.. దానిపై చర్చించేందుకు ఆయనను కలిసినట్లు చెప్పారు. అయితే రాజీనామా చేయాలని ఆలోచిస్తున్నట్లు యూనస్ తనతో చెప్పినట్లు నహిద్ ఇస్లాం వెల్లడించారు. దేశంలోని రాజకీయ పార్టీలు కలిసికట్టుగా లేకపోతే తాను ప్రభుత్వాధినేతగా పనిచేయలేనని చెప్పినట్లు వివరించారు. దేశ భద్రత, భవిష్యత్తు కోసం బలంగా ఉండాలని తాను ఆయనకు చెప్పానని.. పార్టీలన్నీ ఐక్యంగా ఉండి సహకరిస్తాయని ఆశిస్తున్నట్లు తెలిపారు. అధికార కూటమిలోని పార్టీలకు మహమ్మద్ యూనస్‌పై నమ్మకం లేనపుడు ఆయన పదవిలో ఎలా కొనసాగుతారని నహిద్ సందేహం వ్యక్తం చేశారు.

అయితే నహిద్ ఇస్లాం చేసిన రాజీనామా వ్యాఖ్యలు.. యూనస్ సలహాదారు వహీదుద్దీన్ చేసిన ప్రకటనలు పరస్పరం విరుద్ధంగా ఉండటంతో బంగ్లాదేశ్‌ తాత్కాలిక ప్రభుత్వంలో ఉన్న లొసుగులు బయటికి వచ్చాయి. ఇప్పటివరకు మహమ్మద్ యూనస్ ప్రభుత్వాధినేతగా కొనసాగుతారని చెబుతున్నప్పటికీ.. అంతర్గతంగా కొనసాగుతున్న పరిస్థితులు మాత్రం.. ఆయన పదవి నుంచి దిగిపోయే సూచనలు ఉన్నాయని విశ్లేషకులు అభిప్రాయం వ్యక్తం చేస్తున్నారు.