by Suryaa Desk | Sat, May 24, 2025, 11:33 PM

​యూరిక్ యాసిడ్ అనేది రక్తంలో కనిపించే వ్యర్థ పదార్థం. శరీరం ప్యూరిన్స్ అనే కెమిక్సల్స్‌ని ప్రాసెస్ చేసినప్పుడు, విచ్ఛిన్నం చేసినప్పుడు ఇది ఉత్పత్తి అవుతుంది. యూరిక్ యాసిడ్ రక్తంలో కరిగి మూత్రపిండాల ద్వారా వెళ్తుంది. మూత్రంతో కలిసిపోతుంది. ఇది బయటికి వెళ్లకుండా బాడీలోనే ఉంటే సమస్యలు వస్తాయి. శరీర భాగాలు, అవయవాలకి హాని ఏర్పడుతుంది. యూరిక్ యాసిడ్ పెరిగితే కిడ్నీ స్టోన్స్, గౌట్ వంటి సమస్యలొస్తాయి. గౌట్ అనేది ఆర్థరైటిస్‌లో ఓ రకం. దీనిని నేచురల్‌గా తగ్గించుకోవాలంటే కొన్ని టిప్స్ ఉన్నాయంటూ డాక్టర్ హంసాజీ చెబుతున్నారు.

నీరు తాగడం

ఎక్కువగా నీరు తాగడం వల్ల యూరిక్ యాసిడ్‌ని తగ్గించుకోవచ్చు. దీనికోసం రోజంతా ఎక్కువగా నీరు తాగాలి. దీని వల్ల బాడీలోని టాక్సిన్స్ బయటికెళ్లిపోతాయి. బాడీలో టాక్సిన్స్ పేరుకుపోకుండా ఉండేదుకు రోజంతా కనీసం 8 నుంచి 10 గ్లాసుల నీరు తాగాలి. నీటితో పాటు లిక్విడ్స్ కూడా తీసుకోవచ్చు. దీని వల్ల కిడ్నీలకు మేలు జరుగుతుంది.

యూరిక్ యాసిడ్ తగ్గేందుకు హంసాజీ టిప్స్

డైట్

మనం ఏం తింటున్నామో దాన్ని బట్టే మన ఆరోగ్యం ఆధారపడి ఉంటుంది. ముఖ్యంగా హై ప్యూరిన్ ఫుడ్స్‌ని తగ్గించాలి. మాంసాహారం, ఆల్కహాల్‌‌ని తగ్గించాలి. పప్పులు, మొలకల వంటి వాటిని కూడా తగ్గించాలి. వీటిలో ప్యూరిన్ కంటెంట్ ఎక్కువగా ఉంటుంది. జంక్ ఫుడ్, సాలిడ్ ఫుడ్స్ కూడా తగ్గించాలి.

ఏం తినాలి

హై ప్యూరిన్ ఫుడ్ బదులు లో ప్యూరిన్ ఫుడ్స్, పండ్లు, కూరగాయలు తీసుకోవాలి. హోల్ గ్రెయిన్స్, పెసలు, లో ఫ్యాట్ డెయిరీ తీసుకోవాలి. వీటితో పాటు చెర్రీస్, బెర్రీస్ వంటివి కూడా తీసుకోవచ్చు. వీటిలో ఎక్కువగా యాంటీ ఆక్సిడెంట్స్, యాంటీ ఇన్‌ఫ్లమేటరీ గుణాలు ఉంటాయి. వీటిని తీసుకోవడం వల్ల నొప్పి, వాపు, ఇన్‌ఫ్లమేషన్ తగ్గుతుంది. వీటితో పాటు యూరిక్ యాసిడ్‌ని తగ్గేలా చేస్తుంది. విటమిన్ సి ఫుడ్స్, గ్రేప్స్, నారింజ పండ్లు, స్ట్రాబెర్రీస్, పైనాపిల్, బెల్ పెప్పర్స్ వంటివి తీసుకోవాలి. ఉసిరిని కూడా తీసుకోవచ్చు. వీటిని తీసుకోవడం వల్ల యూరిక్ యాసిడ్ బయటికెళ్లేందుకు హెల్ప్ అవుతుంది.

లైఫ్ స్టైల్ చేంజెస్

బరువుని తగ్గించుకోవాలి. బరువు ఎక్కువగా ఉండడం వల్ల కూడా యూరిక్ యాసిడ్‌తో పాటు ఇతర సమస్యల్ని పెంచుతుంది. రెగ్యులర్‌గా ఫిజికల్ వర్కౌట్ చేయాలి. దీని వల్ల గుండె పనితీరు మెరుగ్గా చేస్తుంది, రక్తప్రవాహం సరిగా ఉండేలా చేస్తుంది. మెటబాలిజాన్ని పెంచుతుంది. వాకింగ్, స్విమ్మింగ్, సైక్లింగ్ వంటివి చేయొచ్చు. ఒత్తిడిని తగ్గించుకోవాలి. దీనికోసం యోగా, బ్రీథింగ్ వర్కౌట్స్ చేయడం, ఏదైనా పనులతో ఎంగేజ్ అవ్వడం వంటి చేయొచ్చు. దీని వల్ల సమస్య తగ్గుతుంది.