by Suryaa Desk | Fri, May 23, 2025, 08:19 PM

ప్రపంచ ప్రఖ్యాత యూనివర్సిటీ హార్వర్డ్, అమెరికా అధ్యక్షుడు డొనాల్డ్ ట్రంప్ ప్రభుత్వం మధ్య కొనసాగుతోన్న వివాదం మరో మలుపు తిరిగింది. ఇప్పటికే హార్వర్డ్ యూనివర్సిటీకి ఫెడరల్ నిధులు నిలిపివేసిన ట్రంప్. తాజాగా సంచలన నిర్ణయం తీసుకున్నారు. హార్వర్డ్ యూనివర్సిటీలో అంతర్జాతీయ విద్యార్థులను నమోదు చేసుకునే అర్హత నుంచి తాత్కాలికంగా నిషేధించినట్టు ట్రంప్ యంత్రాంగం ప్రకటించినట్టు న్యూయార్క్ టైమ్స్ నివేదించింది. హోమ్‌ల్యాండ్ సెక్యూరిటీ డిపార్ట్‌మెంట్‌ హార్వర్డ్‌పై జరుపుతోన్న విచారణలో భాగంగా తీసుకున్న చర్య అని పేర్కొంది. ఈ మేరకు హోమ్‌ల్యాండ్ సెక్యూరిటీ కార్యదర్శి క్రిస్టీ నోమ్ హార్వర్డ్ యూనివర్సిటీకి ఒక అధికారిక లేఖను పంపించారు. ట్రంప్ తీసుకున్న నిర్ణయం భారతీయ విద్యార్థులను తీవ్రంగా ప్రభావితం చేయనుంది. రెండోసారి అధికారంలోకి వచ్చినప్పటి నుంచి హార్వర్డ్ యూనివర్సిటీపై అధ్యక్షుడు డొనాల్డ్ ట్రంప్ తరుచూ విమర్శలు చేస్తున్న విషయం తెలిసిందే.

ఎక్స్‌ (ట్విట్టర్)లో పోస్ట్ చేసిన నోమ్ ‘హార్వర్డ్‌లో హింసను, యూదు వ్యతిరేకతను ప్రోత్సహించడం, చైనా కమ్యూనిస్టు పార్టీతో కలిసి పనిచేయడం వల్ల ఈ చర్య తీసుకున్నాం. విదేశీ విద్యార్థులను నమోదు చేసుకోవడం ఓ హక్కు కాదు.. అది ఓ అర్హత మాత్రమే” అని ఆమె వ్యాఖ్యానించారు. అంతేగాక, విశ్వవిద్యాలయాలు విదేశీ విద్యార్థులను చేర్చుకోవడం, వారి చెల్లించే అధిక ఫీజులతో ప్రయోజనం పొంది బిలియన్ డాలర్లు నిధులు సమకూర్చుకుంటున్నారని, ఇది హక్కు, కాదని ఆమె పేర్కొన్నారు. ‘సరైన పని చేయడానికి హార్వర్డ్‌కు అవకాశం ఉన్నా అది నిరాకరించింది.. చట్టాన్ని పాటించడంలో విఫలమైన ఫలితంగా స్టూడెంట్ అండ్ ఎక్స్ఛేంజ్ విజిటర్ ప్రోగ్రామ్ సర్టిఫికేషన్‌ను కోల్పోయారు’ అని నోమ్ తెలిపారు.

అయితే, హార్వర్డ్ యూనివర్సిటీకి పంపిన లేఖలో, రాబోయే విద్యా సంవత్సరానికి ముందు స్టూడెంట్ అండ్ ఎక్స్ఛేంజ్ విజిటర్ ప్రోగ్రాం  సర్టిఫికేషన్ తిరిగి పొందాలంటే 72 గంటల్లో అవసరమైన సమాచారంను సమర్పించాలని పేర్కొంది. ఈ చర్యతో ఇప్పటికే హార్వర్డ్‌లో ఉన్న అంతర్జాతీయ విద్యార్థులు ఇతర యూనివర్సిటీలకు బదిలీ కావలసి వస్తుంది లేకపోతే తమ చట్టబద్ధ స్థితిని కోల్పోతారని హోమ్‌ల్యాండ్ సెక్యూరిటీ శాఖ గురువారం స్పష్టం చేసింది. గాజాలో ఇజ్రాయేల్ దాడులను వ్యతిరేకిస్తూ అమెరికాలోని విద్యా సంస్థలు, కాలేజీల్లో ఆందోళనలపై ట్రంప్ తీవ్ర ఆగ్రహం వ్యక్తం చేస్తున్నారు.

దీనిపై స్పందించిన హార్వర్డ్ యూనివర్సిటీ.. ప్రతీకార చర్య అభివర్ణించింది. ‘సర్కారు తీసుకున్న ఈ చర్య చట్ట విరుద్ధమైనది.. 140కి పైగా దేశాల నుంచి వచ్చిన విద్యార్థులు, పరిశోధకులకు ఆతిథ్యమిస్తూ ప్రపంచాన్ని కాంతివంతం చేస్తున్న వారిని మా వర్సిటీలో కొనసాగించేందుకు మేము పూర్తిగా కట్టుబడి ఉన్నాం’ అని హార్వర్డ్ యూనివర్సిటీ ఒక ప్రకటనలో తెలిపింది. ఇటీవల అమెరికా అధ్యక్షుడు డొనాల్డ్ ట్రంప్ హార్వర్డ్‌ను ‘నవ్వుల వేదిక’గా అభివర్ణించారు. విదేశీ విద్యార్థుల కోసం హార్వర్డ్‌కు ప్రభుత్వం నుంచి వస్తున్న పరిశోధనా ఒప్పందాలనను రద్దు చేయాలని డిమాండ్‌ చేశారు.

‘ఇప్పుడు హార్వర్డ్‌ను చదువు నేర్పే మంచి స్థలంగా కూడా పరిగణించలేం. ప్రపంచంలో గొప్ప విశ్వవిద్యాలయాల జాబితాలో హార్వర్డ్ స్థానం ఉండకూడదు’ అని ట్రంప్ ట్రూత్ సోషల్‌లో వ్యాఖ్యానించారు. ఏప్రిల్ నుంచే హార్వర్డ్‌ విదేశీ విద్యార్థులను తీసుకునే అర్హత కోల్పోతుందనే హెచ్చరిక ట్రంప్ చేశారు. హార్వర్డ్ యూనివర్సిటీ అధికారిక వెబ్‌సైట్ ప్రకారం, ఏటా సుమారు 500-800 మంది భారత విద్యార్థులు, పరిశోధకులు చేరుతున్నారు. ప్రస్తుతం 788 మంది భారతీయ విద్యార్థులు హార్వర్డ్‌లో చదువుతున్నారు.