by Suryaa Desk | Wed, May 21, 2025, 03:12 PM

ఉగ్రవాదంతో పాకిస్థాన్‌కు ఉన్న ప్రత్యక్ష, పరోక్ష సంబంధాలను ప్రపంచ దేశాల ముందుంచేందుకు "ఆపరేషన్ సిందూర్ అవుట్‌రీచ్" పేరుతో భారత్ ఒక సాహసోపేతమైన దౌత్య కార్యక్రమానికి శ్రీకారం చుట్టింది. ఈ భారీ ప్రచారంలో భాగంగా, మాజీ మంత్రులు, అనుభవజ్ఞులైన దౌత్యవేత్తలు, సీనియర్ రాజకీయ నాయకులతో కూడిన 59 మంది పార్లమెంటు సభ్యుల ఏడు ఉన్నతస్థాయి బృందాలు మే 21 నుంచి జూన్ 5 మధ్య 33 దేశాల్లో పర్యటించనున్నాయి.విదేశాంగ కార్యదర్శి విక్రమ్ మిస్రీ పర్యటనకు వెళ్లనున్న బృందాలకు వివరాలు అందిస్తూ మీడియాతో మాట్లాడారు."భారత్ నాలుగు దశాబ్దాలకు పైగా సరిహద్దు ఉగ్రవాదాన్ని ఎదుర్కొంటోంది. ఇటువంటి కార్యకలాపాలను ఎదుర్కోవడంలో మేము ఒక కొత్త, దృఢమైన విధానాన్ని అవలంబించాం," అని స్పష్టం చేశారు. పహల్గామ్ దాడిపై పాకిస్థాన్ సంయుక్త దర్యాప్తు ప్రతిపాదనను తీవ్రంగా ఖండిస్తున్నామని తెలిపారు. "భారత భూభాగంపై జరిగిన ఉగ్రదాడులపై దర్యాప్తులో పాకిస్థాన్‌ను భాగస్వామిని చేయడం అంటే, దొంగ చేతికే తాళాలు అప్పగించినట్లు అవుతుంది. సొంత నేరంపై దర్యాప్తు చేయాలని దొంగను అడుగుతామా? పాక్ తో సంయుక్త దర్యాప్తు కూడా అంతే" అని వ్యాఖ్యానించారు.