by Suryaa Desk | Mon, May 19, 2025, 07:57 PM

అపార్ట్‌మెంట్ కారిడార్‌లో చెప్పులు స్టాండ్ పెట్టారని ఓ కుటుంబానికి అసోసియేషన్ రూ.15 వేలు జరిమానా వేసింది. విస్తుగొలిపే ఈ ఘటన దేశ ఐటీ రాజధాని బెంగళూరు నగరంలో చోటుచేసుకుంది. ఎలక్ట్రానిక్ సిటిలోని ప్రెస్టేజ్ సన్‌రైజ్ పార్క్‌లోని నార్త్ బ్లాక్‌లో నివాసం ఉండే ఓ కుటుంబం.. తన చెప్పుల స్టాండును కారిడార్‌లో పెట్టింది. అయితే, తమ నిబంధనలకు విరుద్దంగా చెప్పుల స్టాండ్ ఉంచడంపై అభ్యంతరం వ్యక్తం చేసిన అసోసియేషన్.. దానిని తీసేయాలని నోటీసులు పంపింది. అయినా, యజమాని పట్టించుకోకపోవడంతో రూ.15,000కు పైగా జరిమానా వసూలు చేశారు.

ఫైర్ సేఫ్టీ నిబంధనల ప్రకారం.., బహుళ అంతస్తుల భవనం ఎగ్జిట్ మార్గాల్లో ఎలాంటి అడ్డంకులు ఉండకూడదు. కారిడారుల్లోని వ్యక్తిగత వస్తువులు, చెప్పుల స్టాండ్లు, మొక్కల వంటివి తొలగించడానికి సొసైటీ ఓ క్యాంపెయిన్ ప్రారంభించింది. ఇందుకోసం రెండు నెలల గడువు ఇచ్చి.. నివాసితులకు నోటీసులు పంపి, కారిడార్‌లో ఉన్నవాటిని తొలగించాలని సూచించింది. గేటెడ్ కమ్యూనిటీలోని మొత్తం 1,046 ఫ్లాట్లకుగానూ ఇద్దరు మాత్రమే తమ వస్తువులను తొలగించలేదు. దీంతో నోటీసులు పంపిన తరువాత వారిలో ఒకరు స్పందించి.. తమ వస్తువులను తొలిగించారు. ఒక్క కుటుంబం మాత్రం అలాగే ఉంచేసింది. దీనిపై ముందే హెచ్చరించిన సొసైటీ.. వారికి రూ.15 వేలు జరిమానా వేసింది. ఫైర్ సేఫ్టీ నిబంధనలపై పలు సందర్భాల్లో సుప్రీంకోర్టు మార్గదర్శకాలు జారీచేసిన విషయం తెలిసిందే.

రెసిడెంట్స్ అసోసియేషన్ అధ్యక్షుడు అరున్ ప్రసాద్ మాట్టాడుతూ.., కారిడార్లో చెప్పుల స్టాండు పెడితే రోజుకు రూ.100 జరిమానా విధిస్తున్నారు. కానీ అతడు మాత్రం ముందస్తుగా రూ.15,000 జరిమానా చెల్లించి, రోజువారీ జరిమానా కింద జమచేసుకోవాలని పేర్కొన్నాడు. ఇటువంటి సమస్యను పరిష్కరించడానికి రోజువారీ జరిమానాను రూ.200కు పెంచాలని అసోసియేషన్ భావిస్తోంది. ‘కామన్ ఏరియాలో వ్యక్తిగత వస్తువులను ఉంచడం కుదరదు.. రెండు మూడుసార్లు చెప్పినప్పటికీ ఇలాగే చేస్తే ప్రమాద సమయంలో సురక్షితంగా బయటపడటం కష్టమవుతుంది’ అని చెప్పారు.

క్యాంపెయిన్ ప్రారంభించిన మొదట్లో సగం మంది బయటే వ్యక్తిగత వస్తువులు ఉంచేవారు.. కానీ వారికి విషయం వివరించి, అవగాహన కల్పించడంతో తొలగించడానికి ఒప్పుకున్నారు.. అయితే, రోజువారీ జరిమానా ఇకపై కూడా కొనసాగించి.. కామన్ ఏరియాలో ఎలాంటి వ్యక్తిగత వస్తువులు లేకుండా చూడటమే మా లక్ష్యం’ అని ఆయన అన్నారు.