by Suryaa Desk | Sat, May 17, 2025, 06:24 AM

ప్రభుత్వ రంగ సైనిక విమానాల తయారీ సంస్థ హిందుస్థాన్ ఏరోనాటిక్స్ లిమిటెడ్  శుక్రవారం ఒక కీలక ప్రకటన చేసింది. అమెరికా టెక్ దిగ్గజం జీఈ నుంచి ఇంజన్ల సరఫరా మొదలవడంతో, ఈ ఏడాది భారత వైమానిక దళానికి 12 తేలికపాటి యుద్ధ విమానాలు ఎంకే1ఏలను అందించగలమని హెచ్‌ఏఎల్ ధీమా వ్యక్తం చేసింది. రాబోయే రెండు నెలల్లోనే తొలి యుద్ధ విమానాన్ని సిద్ధం చేస్తామని ఆర్థిక ఫలితాల వెల్లడి సందర్భంగా సంస్థ ప్రతినిధులు తెలిపారు.తేజస్ ఎల్‌సీఏ ఎంకే1ఏ అనేది హెచ్‌ఏఎల్ అభివృద్ధి చేసిన దేశీయ తేలికపాటి యుద్ధ విమానం  తేజస్‌కు ఆధునిక రూపం. ఇది 4.5వ తరం బహుళ ప్రయోజన యుద్ధ విమానంగా రూపొందించబడింది. అత్యాధునిక పోరాట సామర్థ్యాలు, మెరుగైన మనుగడ, కార్యాచరణ దక్షత దీని ప్రత్యేకతలు.ఏప్రిల్ 2025 నాటికి తమ వద్ద సుమారు రూ.1.89 లక్షల కోట్ల విలువైన ఆర్డర్లు ఉన్నాయని హెచ్‌ఏఎల్ వెల్లడించింది. గత ఏడాది ఇదే సమయానికి ఇది రూ.94,000 కోట్లుగా ఉండటం గమనార్హం. 2025-26 ఆర్థిక సంవత్సరంలో తమ ఆదాయ వృద్ధి 8 నుంచి 10 శాతం మధ్య ఉండొచ్చని ఈ విమానాలు, హెలికాప్టర్ల తయారీ సంస్థ అంచనా వేస్తోంది.భవిష్యత్తులో రానున్న ఆర్డర్ల గురించి ప్రస్తావిస్తూ, మరో 97 ఎల్‌సీఏ ఎంకే1ఏ యుద్ధ విమానాలు, భారత వైమానిక దళం కోసం 143 ఏఎల్‌హెచ్ అడ్వాన్స్‌డ్ లైట్ హెలికాప్టర్లు భారత నౌకాదళం కోసం 10 డోర్నియర్ విమానాలకు ఆర్డర్లు రానున్నాయని, వీటి విలువ సుమారు రూ.1.25 లక్షల కోట్లు ఉంటుందని సంస్థ తెలిపింది.ఎల్‌సీఏ ఎంకే1ఏ యుద్ధ విమానాల తయారీ కోసం బెంగళూరు, నాసిక్‌లలో ఒక్కోటి చొప్పున రెండు తయారీ విభాగాలను హెచ్‌ఏఎల్ ఏర్పాటుచేసింది. పెరుగుతున్న డిమాండ్‌కు అనుగుణంగా విమానాలు, హెలికాప్టర్ల తయారీ సామర్థ్యాన్ని మరింత విస్తరించనున్నట్లు సంస్థ ప్రకటించింది. ముఖ్యంగా మహారాష్ట్రలోని నాసిక్ ఫ్యాక్టరీలో ఉత్పత్తి సామర్థ్యం పెంపుదల, విమానాలు మరియు హెలికాప్టర్ల సకాలంలో డెలివరీలకు కీలకం కానుందని భావిస్తున్నారు.యుద్ధ విమానాలు, హెలికాప్టర్లను నిర్దేశిత గడువులోగా ఐఏఎఫ్‌కు అందించేందుకు, రాబోయే ఐదేళ్లలో ఉత్పత్తి ప్రణాళికల కోసం రూ.14,000 కోట్ల నుంచి రూ.15,000 కోట్ల మూలధన వ్యయాన్ని చేపట్టాలని ఈ ప్రభుత్వ రంగ రక్షణ సంస్థ యోచిస్తోంది. అంటే, సంస్థ ఏటా సుమారు రూ.3,000 కోట్లను పెట్టుబడిగా పెట్టనుంది.కాగా, శుక్రవారం హెచ్‌ఏఎల్ షేర్ల ధర 5 శాతం పెరిగింది. 'ఆపరేషన్ సిందూర్' విజయం దేశీయ రక్షణ సంస్థలకు ఆర్డర్లను మరింత వేగవంతం చేస్తుందన్న అంచనాల నేపథ్యంలో, ఇతర రక్షణ రంగ కంపెనీల షేర్లలో కూడా సాధారణంగా సానుకూలత కనిపించింది. పహల్గామ్ ఉగ్రదాడి అనంతరం పాకిస్థాన్‌తో ఉద్రిక్తతలు పెరిగినందున, ప్రభుత్వం రక్షణ బడ్జెట్‌ను పెంచే అవకాశం ఉందన్న విశ్లేషణలు కూడా మార్కెట్ వర్గాల్లో వినిపిస్తున్నాయి.