by Suryaa Desk | Thu, May 15, 2025, 11:49 AM

జమ్మూ కాశ్మీర్‌లో భద్రతా బలగాలు ఉగ్రవాదులపై మరో విజయాన్ని సాధించాయి. పుల్వామా జిల్లా థ్రాల్ ప్రాంతంలోని నాదిర్ గ్రామంలో గురువారం ఉదయం జరిగిన ఎదురుకాల్పుల్లో ముగ్గురు జైష్-ఎ-మొహమ్మద్ (JeM) ఉగ్రవాదులను భద్రతా దళాలు ఎన్‌కౌంటర్‌ చేశాయి.
ఇది 48 గంటల వ్యవధిలో జమ్మూ కాశ్మీర్‌లో జరిగిన రెండో ఎన్‌కౌంటర్ కావడం గమనార్హం. అధికారుల ప్రకారం, ఎన్‌కౌంటర్‌లో మృతిచెందిన ఉగ్రవాదులను అసిఫ్ అహ్మద్ షేక్, అమీర్ నజీర్ వాని, యావర్ అహ్మద్ భట్లుగా గుర్తించారు. ఈ ముగ్గురూ కూడా పుల్వామా జిల్లాకు చెందినవారేనని సమాచారం.
ఈ ఉగ్రవాదులు జైష్-ఎ-మొహమ్మద్ సంస్థలో చురుకుగా పని చేస్తున్నట్టు విచారణలో తేలిందని అధికారులు తెలిపారు. వారి వద్ద నుండి ఆయుధాలు, భారీగా మందుగుండు సామగ్రి స్వాధీనం చేసుకున్నారు. భద్రతా బలగాల విజ్ఞతతో పెద్ద ముప్పు తొలగించబడిందని, ఇలాంటి చర్యలు భవిష్యత్తులోను కొనసాగుతాయని పోలీసులు స్పష్టం చేశారు.