by Suryaa Desk | Sat, Mar 16, 2024, 10:29 PM

 ప్రస్తుతం దేశంలో సార్వత్రిక ఎన్నికల నగారా మోగింది. లోక్‌సభతోపాటు 4 రాష్ట్రాల అసెంబ్లీల ఎన్నికల పోలింగ్‌కు తేదీలు విడుదల అయ్యాయి. ఎన్నికలు అంటేనే డబ్బు, మద్యం, బహుమతులు చేతులు మారుతూనే ఉంటాయి. అయితే ఎన్నికల సంఘం, అధికారులు.. ఇలాంటి ప్రలోభాలను అడ్డుకునేందుకు ప్రభుత్వం, పోలీసులతో కలిసి అన్ని రకాల చర్యలు చేపడుతూ ఉంటారు. ఇక మారుతున్న కాలానికి అనుగుణంగా ఎన్నికల సంఘం కూడా టెక్నాలజీని అందిపుచ్చుకుంటోంది. ఈ క్రమంలోనే ఎన్నికల్లో రాజకీయ పార్టీలు, అభ్యర్థులు.. ఓటర్లను డబ్బు, మద్యం, బహుమతులతో ప్రలోభపెట్టకుండా ఉండేందుకు అన్ని రకాల చర్యలు తీసుకుంటుంది. ఇందులో భాగంగానే ఎన్నికల అక్రమాలపై ఎన్నికల సంఘానికి ఫిర్యాదు చేసేందుకు సీ విజిల్ యాప్‌ను తీసుకువచ్చింది. దీని ద్వారా దేశంలో ఏ మూలన ఉన్న పౌరుడు అయినా ఫిర్యాదు చేసే అవకాశం కల్పించారు.

ఈ సీ విజిల్ యాప్ ద్వారా దేశంలోని ప్రతీ ఒక్క పౌరుడు తన ముందు జరిగే ఎన్నికల ఉల్లంఘనలు, అక్రమాలను నేరుగా ఫిర్యాదు చేయవచ్చు. ఓటర్లను మభ్య పెట్టేందుకు రాజకీయ పార్టీలు, ఎన్నికల్లో పోటీ చేసే అభ్యర్థులు అక్రమంగా నగదు, మద్యం, ఇతర వస్తువులను పంపిణీ చేయడం, ఎన్నికల కోడ్‌ను ఉల్లంఘించడం, అభ్యర్థుల దుష్ప్రవర్తనపై ఎవరైనా ఫిర్యాదు చేయవచ్చు. వాటికి సంబంధించిన ఫోటోలు, వీడియోలను తీసి సీ విజిల్ యాప్‌లో అప్‌లోడ్ చేస్తే.. ఎన్నికల అధికారులకు చేరుతుంది. ఈ ఫిర్యాదు అందిన 100 నిమిషాల్లో ఎన్నికల సంఘం అధికారులు సంబంధిత వ్యక్తులపై చర్యలు తీసుకుంటారు.

ఎలా ఫిర్యాదు చేయాలి

మన దగ్గర ఉన్న స్మార్ట్‌ఫోన్‌లో గూగుల్ ప్లే స్టోర్‌, యాపిల్ స్టోర్ నుంచి సీ విజిల్ యాప్‌ను డౌన్‌లోడ్ చేయాలి. అందులో మన వివరాలతో లాగిన్ అవ్వాలి. ఆ తర్వాత ఎక్కడైనా డబ్బు, మద్యం, గిఫ్ట్‌లు పంపిణీ గానీ.. సరఫరా గానీ జరిగినట్లు గుర్తిస్తే.. వాటిని రహస్యంగా సెల్‌ఫోన్‌లో ఫోటోలు తీయాలి. వాటిని సీ విజిల్ యాప్‌లో అప్‌లోడ్ చేసి వివరాలు వెల్లడించాలి. 2 నిమిషాల నిడివి ఉన్న వీడియోలను కూడా అప్‌లోడ్ చేసే అవకాశం ఉంటుంది. ఫోటోలు, వీడియోలు అప్‌లోడ్ చేసే సమయంలో సెల్‌ఫోన్‌లో జీపీఎస్ ఆన్‌ చేసి ఉండాలి. అభ్యర్థులు, స్థానిక నాయకులు ఎవరైనా వచ్చి తమ పార్టీకే ఓటు వేయాలని డబ్బులు పంచేందుకు ప్రయత్నించినా ఫిర్యాదు చేయవచ్చు. అంతేకాకుండా రాజకీయ పార్టీలకు చెందిన నేతలు ఎవరైనా ఎన్నికల ప్రచారంలో భాగంగా నిర్వహించే సభలు, సమావేశాలు, ర్యాలీల్లో విద్వేషపూరిత వ్యాఖ్యలు చేసినా ఫిర్యాదు చేయొచ్చు.

సీ విజిల్ యాప్ ద్వారా పంపిన పంపిన ఫోటోలు, వీడియోలు నేరుగా కేంద్ర, రాష్ట్ర ఎన్నికల కమిషన్‌లకు చేరుతాయి. జీపీఎస్ ద్వారా మనం ఉన్న లొకేషన్‌ను ఎన్నికల సంఘం అధికారులు ట్రాక్ చేస్తారు. ఇక ఆ ఫిర్యాదు నుంచి ఆ లొకేషన్‌ నుంచి డిస్ట్రిక్ట్ కంట్రోల్ రూమ్‌కు వెళ్తాయి. వాటిని ఆ లొకేషన్‌కు దగ్గరలో ఉండే ఎన్నికల బృందాలకు సంబంధిత అధికారులు పంపిస్తారు. వెంటనే స్పెషల్ ఆఫీసర్స్ రంగంలోకి దిగి అక్రమాలను అడ్డుకుంటాయి. ఇప్పటివరకు కొన్ని రాష్ట్రాల అసెంబ్లీ ఎన్నికల్లో ఇలాంటి ఫిర్యాదులు వచ్చాయని.. వాటిపై చర్యలు తీసుకున్నట్లు కేంద్ర ఎన్నికల సంఘం వెల్లడించింది.

ఇక మనం సీ విజిల్ యాప్ నుంచి ఫిర్యాదు జరిగిన వెంటనే 100 నిమిషాలలోపే ఈ ప్రక్రియ అంతా జరుగుతుంది. సీ విజిల్ యాప్‌లో ఫిర్యాదు చేసిన వెంటనే మన మొబైల్ నంబర్‌కు ఒక యూనిక్ ఐడీ వస్తుంది. ఆ ఐడీ ద్వారా తర్వాత మనం ఇచ్చిన ఫిర్యాదు ఏ దశలో ఉంది. ఆ ఫిర్యాదుపై ఎన్నికల సంఘం అధికారులు ఏ రకమైన చర్యలు చేపట్టారు అనేది తెలుసుకోవచ్చు. అయితే ఎన్నికల్లో జరిగే అక్రమాలపై ఫిర్యాదులు చేసేవారిపై ఆయా పార్టీలు, అభ్యర్థులు ఎలాంటి దాడులు చేయకుండా ఫిర్యాదు చేసిన వారి వివరాలను ఎన్నికల సంఘం అధికారులు గోప్యంగా ఉంచుతారు.