by Suryaa Desk | Thu, Mar 14, 2024, 10:49 PM

పిల్లి నగరాన్ని వణికించడం ఏంటి అని ఆశ్చర్యపోతున్నారా.. అవును మీరు చదివింది నిజమే. ఒక పిల్లి ప్రస్తుతం ఆ నగరంలోని అధికారులు, ప్రజలకు కంటి మీద కునుకు లేకుండా చేస్తోంది. దీంతో నగరంలో ఆ పిల్లి కారణంగా ఎప్పుడు ఎలాంటి వార్త వినాల్సి వస్తుందోనని ఆ నగర వాసులు తీవ్ర భయం వ్యక్తం చేస్తున్నారు. అయితే ఆ పిల్లి ఒక ప్రమాదకరమైన రసాయనాలు ఉన్న ట్యాంకులో పడిందని.. ఆ తర్వాత అది అక్కడి నుంచి పారిపోయిందని అధికారులు తెలిపారు. ఆ రసాయనం చాలా డేంజర్ అని.. దాన్ని తాకితే చనిపోయే ప్రమాదం కూడా ఉందని అధికారులు హెచ్చరించడంతో నగర వాసులు తీవ్ర భయభ్రాంతులకు గురవుతున్నారు. ఈ సంఘటన జపాన్‌లో జరిగింది. ఆ కెమికల్ కారణంగా క్యాన్సర్‌ వస్తుందని అధికారులు పేర్కొనడం పెను సంచలనంగా మారింది.

జపాన్‌ హిరోషిమాలోని ఫుకుయామా నగరంలో ఈ సంఘటన జరిగింది. స్థానికంగా ఉన్న ఓ ఫ్యాక్టరీ నుంచి ఓ పిల్లి తప్పిపోయింది. అయితే అది తప్పిపోవడానికి ముందు.. ఆ ఫ్యాక్టరీలో ఉన్న కెమికల్ ట్యాంక్‌లో పడిందని కార్మికులు వెల్లడించారు. ఆ తర్వాత అది కనిపించకుండా పోయిందని తెలిపారు. ఈ విషయాన్ని అధికారులకు చెప్పగా.. వారు రంగంలోకి దిగి పిల్లిని వెతికే పనిలో పడ్డారు. ఆ పిల్లి నగరంలో తిరుగుతూ ఆ కెమికల్‌ను అంతటా వ్యాప్తి చేస్తుందని అధికారులు, జనం భయపడుతున్నారు. ఆ పిల్లికి అంటుకున్న రసాయనం ద్వారా క్యాన్సర్ వస్తుందని అధికారులు తెలపడంతో ఫుకుయామా నగర వాసులు వణికిపోతున్నారు.

ఫుకుయామా నగరంలో ఆ పిల్లిని వెతికేందుకు అధికారులు పెట్రోలింగ్‌ను మరింత పెంచారు. ఆ పిల్లి ఎక్కడ కనిపించినా అప్రమత్తంగా ఉండాలని అధికారులు.. ప్రజలకు సూచించారు. ఆ ఫ్యాక్టరీ నుంచి డేంజరెస్ కెమికల్ అంటుకున్న పిల్లి.. బయటికి వెళ్తున్న దృశ్యాలు.. అక్కడే ఉన్న సీసీటీవీ కెమెరాల్లో రికార్డ్ అయ్యయి. దీంతో ఆ వీడియోలను వైరల్ చేసిన అధికారులు ఆ పిల్లి ఎక్కడ కనిపించినా సమాచారం అందించాలని ఫుకుయామా నగరవాసులకు సూచించారు. ఆ ఫ్యాక్టరీలో ఉన్న ఓ కార్మికుడు పిల్లి పంజా గుర్తులను గుర్తించి అధికారులకు తెలిపాడు.

ఆ పిల్లికి అంటుకున్న కెమికల్ చాలా డేంజర్ అని అధికారులు వెల్లడించారు. దాన్ని ముట్టుకున్నా లేదా పీల్చినా వెంటనే శరీరంపై దద్దుర్లు, వాపు వస్తాయని.. ఆ తర్వాత తీవ్ర అస్వస్థతకు దారి తీస్తుందని డాక్టర్లు హెచ్చరికలు చేస్తున్నారు. ఫుకుయామా సిటీ హాల్‌లోని ఒక అధికారి మీడియాతో మాట్లాడుతూ ఆ ప్రాంతంలో తప్పిపోయిన పిల్లి కోసం వెతుకుతున్నామని తెలిపారు. ఇప్పటివరకు దానిని కనిపెట్టలేదని వెల్లడించారు. అయితే ఆ పిల్లి బతికే ఉందా లేక చనిపోయిందా అనే విషయం కూడా తెలియడం లేదని చెప్పారు.

ఫ్యాక్టరీలో కెమికల్ ట్యాంక్‌ను కప్పి ఉంచే షీట్ కొద్దిగా చిరిగిపోయి ఉందని ఫ్యాక్టరీ మేనేజర్ వెల్లడించాడు. అందులో పిల్లి పడి.. ఆ తర్వాత ఎక్కడికో వెళ్లిపోయిందని తెలిపాడు. దాన్ని వెతికేందుకు తమ ఫ్యాక్టరీ సిబ్బంది కూడా ప్రయత్నాలు చేస్తున్నారని చెప్పాడు. సాధారణంగా పిల్లులు తమ శరీరాన్ని తామే నాకుతూ ఉంటాయని స్వీడన్‌లోని కరోలిన్‌స్కా ఇన్‌స్టిట్యూట్‌కు చెందిన ఒక ప్రొఫెసర్ లిండా షెంక్ తెలిపారు. ఈ రకంగా చూస్తే ఆ పిల్లి ఇప్పటికే తన శరీరాన్ని తానే నాకడంతో ఆ రసాయనం శరీరంలోకి వెళ్లి చనిపోయి ఉంటుందని అనుమానం వ్యక్తం చేశారు. అయితే ఒక వేళ పిల్లి చనిపోయినా దాని మృతదేహం అయినా దొరకాలి కదా అని నగరవాసులు ప్రశ్నిస్తున్నారు.