by Suryaa Desk | Wed, Mar 13, 2024, 09:51 PM

కెనడాలో మళ్లీ ఖలిస్థానీ మద్దతుదారులు రెచ్చిపోతున్నారు. భారత్‌కు వ్యతిరేకంగా నినాదాలు చేస్తూ అక్కడ ఆందోళనలు, నిరసనలు వ్యక్తం చేస్తున్నారు. ఇక గతేడాది కెనడాలో హత్యకు గురైన ఖలిస్థానీ ఉగ్రవాది హర్దీప్ సింగ్ నిజ్జర్ విషయంలో భారత్‌పై ఆరోపణలు రావడం.. ఖలిస్థానీ మద్దతుదారుల నిరసనలు మరింత పెరిగాయి. హర్దీప్ సింగ్ నిజ్జర్ హత్యలో భారత ఏజెంట్ల పాత్ర ఉందని.. కెనడా ప్రధాని జస్టిన్ ట్రూడో చేసిన వివాదాస్పద వ్యాఖ్యలు.. రెండు దేశాల మధ్య ఉన్న సత్సంబంధాలను దెబ్బతీశాయి. అప్పటి నుంచి ఖలిస్థాన్ మద్దతుదారులు.. భారత్ పట్ల, భారత రాజకీయ నేతలు లక్ష్యంగా తీవ్ర బెదిరింపులకు దిగిన ఘటనలు ఉన్నాయి. ఈ క్రమంలోనే తాజాగా మరోసారి నిజ్జర్ హత్యకు వ్యతిరేకంగా భారత్‌పై విమర్శలు గుప్పిస్తూ కెనడాలో ఖలిస్థానీ మద్దతుదారులు తీవ్ర ఆందోళనలు చేశారు.

కెనడా అల్బెర్టాలోని ఎడ్మోంటన్ ప్రాంతంలో భారీగా ఖలిస్థానీ మద్దతుదారులు చేరుకుని మంగళవారం తీవ్ర నిరసనలు వ్యక్తం చేశారు. కత్తులు, ఈటెలు, ఇతర మారణాయుధాలు తీసుకువచ్చి తీవ్ర కలకలం రేపారు. హర్దీప్ సింగ్ నిజ్జర్ హత్యలో భారత ఏజెంట్ల పాత్ర ఉందని ఆరోపిస్తూ.. కెనడాలోని భారత హై కమిషనర్ సంజయ్ కుమార్ వర్మకు వ్యతిరేకంగా ఈ నిరసనలు చేపట్టారు. కొన్ని గంటల పాటు ఆపకుండా భారత్‌కు వ్యతిరేకంగా నినాదాలు చేస్తూనే ఉన్నారు. ఈ క్రమంలోనే సంజయ్ కుమార్ వర్మకు వ్యతిరేకంగా తీవ్ర అనుచిత వ్యాఖ్యలు, నినాదాలు చేసినట్లు తెలుస్తోంది. మార్చి 11 వ తేదీన ఎడ్మోంటన్‌లో ఇండో కెనడియన్ ఛాంబర్ ఆఫ్ కామర్స్ ఏర్పాటు చేసిన కార్యక్రమంలో ఈ సంఘటన చోటు చేసుకుంది.

ఈ క్రమంలోనే ఖలిస్థానీ మద్దతుదారులను అడ్డుకునేందుకు, వారిని చెదరగొట్టేందుకు ఎడ్మోంటన్ పోలీసులు తీవ్రంగా ప్రయత్నించారు. ఇక భారత హై కమిషనర్ సంజయ్ కుమార్ వర్మ వాహనం వైపు దూసుకెళ్లేందుకు ప్రయత్నించిన ఖలిస్థానీ మద్దతుదారులను పోలీసులు అడ్డుకున్నారు. దీంతో అక్కడ తీవ్ర ఉద్రిక్తత నెలకొంది. ఖలిస్థాన్‌కు అనుకూలంగా.. భారత్‌కు వ్యతిరేకంగా నినాదాలు చేస్తున్న ఆందోళన కారులను అడ్డుకునేందుకు పోలీసులు తీవ్రంగా కష్టపడ్డారు. చివరికి వారిని అక్కడి నుంచి చెదరగొట్టి వెళ్లగొట్టారు.

ఇక ఆ నిరసనలను కవర్ చేస్తున్న యాంటీ కరెప్షన్ ఇన్వెస్టిగేటివ్ జర్నలిస్ట్‌పై ఓ ఖలిస్థానీ మద్దతుదారుడు దాడి చేసేందుకు ప్రయత్నించాడు. ఈ విషయాన్ని స్వయంగా ఆ జర్నలిస్ట్ వెల్లడించాడు. ఆ వ్యక్తి వచ్చి తన కెమెరాను లాక్కున్నాడని.. తనను పక్కకు నెట్టేసినట్లు తెలిపాడు. పైగా తాను వారికి వ్యతిరేకంగా వ్యాఖ్యలు చేసినట్లు తన తోటి ఖలిస్థానీ మద్దతుదారులకు చెప్పినట్లు వివరించాడు. కానీ తాను మాత్రం దూరం నుంచే ఆ కార్యక్రమాన్ని కవర్ చేసినట్లు తెలిపాడు. అయితే అది గమనించిన ఓ పోలీస్ అధికారి.. అతడ్ని లాగేసినట్లు చెప్పాడు.

హర్దీప్ సింగ్ నిజ్జర్ హత్య వెనుక భారత ఏజెంట్ల హస్తం ఉందని కెనడా ప్రధాని చేసిన ఆరోపణలను భారత్ తీవ్రంగా ఖండించింది. అవన్నీ అబద్ధాలని ఇప్పటికే చాలాసార్లు స్పష్టం చేసింది. ఖలిస్థాన్ ఉగ్రవాది అయిన హర్దీప్ సింగ్ నిజ్జర్‌ను కెనడాలోని ఓ గురుద్వారా వద్ద గత ఏడాది జూన్ 18 వ తేదీన గుర్తు తెలియని వ్యక్తులు కాల్చి చంపారు. హర్దీప్ సింగ్ నిజ్జర్‌ను భారత్ మోస్ట్ వాంటెండ్ ఉగ్రవాదిగా అంతకుముందే ప్రకటించింది.