by Suryaa Desk | Fri, Feb 09, 2024, 09:05 PM

ఏపీఎస్‌ఆర్టీసీ ఉద్యోగులకు జగన్ సర్కార్ శుభవార్త చెప్పింది. రాత్రి సర్వీసుల్లో విధులకు వెళ్లే ఆర్టీసీలో డ్రైవర్‌, కండక్టర్లకు నైట్‌ ఔట్‌ భత్యాలను జీతంలో కలిపి చెల్లించేలా యాజమాన్యం ఆదేశాలు జారీచేసింది. గతంలో ఆర్టీసీ ద్వారా జీతాలు ఇచ్చినప్పుడు వీరికి ఈ భత్యం చెల్లించేవారు. సీఎఫ్‌ఎంఎస్‌ ద్వారా జీతాలు ఇవ్వడం మొదలైనప్పటి నుంచి ఆగిపోయింది. దీనిపై ఉద్యోగ సంఘాలు పదేపదే విజ్ఞప్తులు చేయడంతో తాజాగా ఆదేశాలు ఇచ్చారు. దీని ప్రకారం రాష్ట్ర పరిధిలో 6-12 గంటల మధ్య నైట్‌ ఔట్‌ విధులకు వెళ్లిన వారికి రూ. 150, అలాగే 12 గంటలకు పైగా విధుల్లో ఉంటే రూ. 300 చొప్పున చెల్లిస్తారు. పొరుగు రాష్ట్రాలకు వెళ్లే రాత్రి సర్వీసుల్లో విధులకు రూ. 200-400 చొప్పున చెల్లించనున్నారు.

ప్రభుత్వం జారీ చేసిన ఈ ఆదేశాలపై ఎన్‌ఎంయూఏ, ఈయూ హర్షం వ్యక్తం చేశాయి. డేఔట్‌ విధులకు వెళ్లేవారికి కూడా భత్యాలు చెల్లించాలని ఎన్‌ఎంయూఏ అధ్యక్ష, ప్రధాన కార్యదర్శులు కోరారు. నైట్‌ ఔట్‌ భత్యానికి సంబంధించి 20 నెలల బకాయిలు చెల్లించాలని ఈయూ అధ్యక్ష, ప్రధాన కార్యదర్శులు కోరారు.ఈ భత్యాలను జీతంతో పాటూ అకౌంట్‌లో జమ చేయనున్నారు. ప్రభుత్వ నిర్ణయాన్ని ఉద్యోగులు స్వాగతించారు.. ధన్యవాదాలు తెలిపారు.