by Suryaa Desk | Mon, Feb 05, 2024, 09:04 PM

ఏపీ వ్యాప్తంగా సంచలనం సృష్టించిన ఎమ్మా్ర్వో రమణయ్య హత్యకేసులో నిందితుడు గంగారావు పోలీసులకు చిక్కాడు. ఎమ్మార్వోపై దాడి తర్వాత పారిపోయిన నిందితుణ్ని చెన్నై శివార్లలో వైజాగ్ పోలీసులు అదుపులోకి తీసుకున్నారు. అయితే ఎమ్మార్వోపై దాడి చేసిన తర్వాతి రోజు మధ్యాహ్నం వరకూ గంగారావు విశాఖలోనే ఉన్నాడు. ఆ తర్వాత దర్జాగా ఫ్లైట్ ఎక్కి పారిపోవటంపై పోలీసుల మీద విమర్శలు వ్యక్తమయ్యాయి. హత్య తర్వాత ఎయిర్ పోర్టు వద్ద తనిఖీలు ఉన్నప్పటికీ నిందితుడు విమానంలో పారిపోయిన వైనంపై ఉన్నతాధికారులు స్థానిక పోలీసులపై సీరియస్ అయినట్లు తెలిసింది. ఈ నేపథ్యంలో అసలేం జరిగిందో వైజాగ్ సీపీ రవిశంకర్ మీడియాకు వెల్లడించారు.

విశాఖ రూరల్ పరిధిలో ఎమ్మార్వోగా విధులు నిర్వహించిన సనపాల రమణయ్య.. ఇటీవలే విజయనగరం జిల్లాకు ట్రాన్స్‌ఫర్ అయ్యారు. విజయనగరం జిల్లాలోని బొండపల్లికి బదిలీ అయ్యారు రమణయ్య. గత శుక్రవారమే అక్కడ విధులు కూడా స్వీకరించారు. అయితే అదేరోజు రాత్రి దారుణంగా హత్యకు గురయ్యారు. రమణయ్యపై మధురవాడలోని ఆయన ఇంటివద్ద రాత్రి పదిగంటల సమయంలో ఓ వ్యక్తి ఇనుపరాడ్‌తో దాడి చేశారు. ఈ ఘటనలో తీవ్రంగా గాయపడిన ఆయన చికిత్స పొందుతూ ప్రాణాలు కోల్పోయారు. ఈ ఘటన స్థానికంగానే కాకుండా రాష్ట్రవ్యాప్తంగా చర్చనీయాంశమైంది. విశాఖలో శాంతిభద్రతలు క్షీణించాయని, వైజాగ్ క్రైమ్ క్యాపిట‌ల్‌గా మారిందంటూ విపక్షాల నుంచి విమర్శలు వచ్చాయి.

అయితే దాడి చేసిన వ్యక్తిని మురారి సుబ్రమణ్యం గంగారావు అనే వ్యక్తిగా పోలీసులు గుర్తించారు.నిందితుడి కోసం పది బృందాలతో గాలింపు చేపట్టారు. చివరకు చెన్నై శివార్లలో గంగారావు అదుపులోకి తీసుకున్నారు. అయితే విచారణలో నిందితుడికి, ఎమ్మార్వోకు మధ్య రియల్ ఎస్టేట్‌కు సంబంధించిన సమస్యలు ఉన్నట్లు తేలిందని పోలీసులు తెలిపారు. ల్యాండ్ విషయంలో కన్వేయన్స్ డీడ్ కు సంబందించిన కేసులో హత్య చేసినట్లు గంగారావు అంగీకరించాడని వైజాగ్ సీపీ రవిశంకర్ తెలిపారు. ఎమ్మార్వోపై దాడి చేసిన తర్వాత శనివారం మధ్యాహ్నం వరకూ గంగారావు వైజాగ్‌లోనే ఉన్నట్లు అంగీకరించారు.

శనివారం మధ్యాహ్నం వైజాగ్‌ ఎయిర్‌పోర్టుకు వెళ్లిన గంగారావు.. అక్కడి నుంచి బెంగళూరు వెళ్లినట్లు రవిశంకర్ తెలిపారు. అప్పటికే నిందితుడి కోసం గాలింపు చర్యలు చేపట్టామని.. ఎయిర్ పోర్టులో సిబ్బందిని సైతం అలెర్ట్ చేసినట్లు చెప్పుకొచ్చారు. అయితే బోర్డింగ్ పాసులో గంగారావు పూర్తిపేరు కాకుండా షార్ట్ నేమ్ ఉండటంతో నిందితుడు తప్పించుకున్నట్లు వెల్లడించారు. ఆ తర్వాత బెంగళూరు నుంచి ట్రైన్‌లో చెన్నైకి చేరినట్లు వివరించారు. చివరకు చెన్నై శివార్లలో గంగారావు అదుపులోకి తీసుకున్నట్లు వైజాగ్ సీపీ వెల్లడించారు. మరోవైపు గంగారావుపై గతంలోనూ హైదరాబాద్, విజయవాడలో ఆర్థిక మోసాల కేసులు నమోదైనట్లు పోలీసులు తెలిపారు.