by Suryaa Desk | Sat, Sep 16, 2023, 11:18 PM

రిపోర్టర్‌లు అంటే ఏదైనా ఘటన జరిగినపుడు దానికి సంబంధించిన విషయాలు, వార్తలను ప్రపంచానికి తెలియజేస్తూ ఉంటారు. అలాంటి వారికి క్షేత్ర స్థాయిలో అనేక సవాళ్లు ఎదురవుతూ ఉంటాయి. అయితే తాజాగా ఓ మహిళా రిపోర్టర్‌కు ఎదురైన సంఘటన సోషల్ మీడియాలో తీవ్ర విమర్శలకు దారి తీస్తోంది. లైవ్‌లో రిపోర్టింగ్ చేస్తున్న ఓ మహిళా రిపోర్టర్‌ను.. ఓ వ్యక్తి లైంగికంగా వేధించాడు. వెనక నుంచి వచ్చి ఆమె ప్రైవేట్ పార్ట్స్‌పై చేయి వేశాడు. ఈ తతంగం మొత్తం లైవ్‌లో రికార్డ్ కావడంతో వెలుగులోకి వచ్చింది. ఈ వీడియో చూసిన పోలీసులు.. నిందితుడిని గుర్తించి అరెస్ట్ చేశారు.

ఈ ఘటన సెప్టెంబర్ 12 న స్పెయిన్‌లో జరిగింది. రాజధాని మాడ్రిడ్‌లో స్థానికంగా ఉండే ఓ స్పానిష్‌ టీవీకి చెందిన మహిళా జర్నలిస్ట్ ఇసా బాలాడో వార్తలు రిపోర్ట్ చేస్తుండగా.. ఈ సంఘటన చోటు చేసుకుంది. అక్కడ జరిగిన ఓ దొంగతనం గురించి ఇసా బాలాడో లైవ్‌లో వివరిస్తుండగా.. వెనక నుంచి ఓ వ్యక్తి వచ్చి ఆమె వెనుక భాగంపై చేయి వేశాడు. మీది ఏ ఛానల్ అంటూ ప్రశ్నించాడు. ఈ ఘటనతో లైవ్‌లో వార్తలు చెబుతున్న ఇసా బాలాడో ఒక్కసారిగా షాక్ అయింది. అయితే లైవ్‌లో ఉండడంతో వార్తలను కొనసాగించింది.

అయితే ఇసా బాలాడో వార్తలు చెబుతుండగా.. టీవీ స్టూడియోలో ఉన్న యాంకర్ నాచో అబాద్ షాక్ అయి ఆమెతో మాట్లాడారు. ఆ వీడియోలో కనిపిస్తున్నట్లు ఆ వ్యక్తి మీ వెనుక బాగాన్ని తాకాడా అని ప్రశ్నించారు. దానికి ఆమె అవును అని సమాధానం చెప్పింది. దీంతో కోపంతో ఊగిపోయిన ఆ యాంకర్.. కెమెరాను ఆ నిందితుడి వైపు చూపించాలని వారికి సూచించాడు. దీంతో కెమెరామెన్.. కెమెరాను ఆ వ్యక్తి వైపు తిప్పాడు. ఆమె ఏ ఛానల్ నుంచి వచ్చారు అని అడగడానికి అసభ్యంగా తాకాల్సిన అవసరం ఉందా అని ప్రశ్నించాడు. అక్కడ లైవ్ షో నడుస్తోందని.. పనిచేసుకుంటున్న వారి వద్దకు వచ్చి అలా డిస్టర్బ్ చేశావని ఆగ్రహం వ్యక్తం చేశాడు.

అయితే తాను ఏ తప్పు చేయలేదని ఆ వ్యక్తి సమర్థించుకోవడం మరింత విడ్డూరంగా మారింది. తాను అలా ఏమీ చేయలేదని అదే లైవ్‌లో వెల్లడించాడు. చివరికి అక్కడి నుంచి వెళ్తూ మహిళా రిపోర్టర్ జుట్టును తాకాడు. ఆ తర్వాత మళ్లీ వచ్చి వార్తల్లో నిజం చెప్పాలి అంటూ మాట్లాడటం ఆ వీడియోలో వినిపిస్తోంది. అయితే ఈ వీడియో వైరల్‌గా మారడంతో స్థానికంగా ఉన్న పోలీసులు రంగంలోకి దిగారు. లైవ్‌లో మహిళా రిపోర్టర్‌తో అసభ్యంగా ప్రవర్తించి.. లైంగిక వేధింపులకు పాల్పడినందుకు అతడ్ని అరెస్ట్ చేశారు. దీనికి సంబంధించిన చిన్న వీడియో ఒకటి సోషల్ మీడియాలో వైరల్‌గా మారింది. అందులో ఇద్దరు పోలీసు అధికారులు ఓ వ్యక్తిని సంకెళ్లతో బంధించి తీసుకువెళ్తున్నట్లు ఉంది. ఈ ఘటనపై ఆ మహిళా రిపోర్టర్ పనిచేస్తున్న టీవీ ఛానల్ స్పందించింది. ఇలాంటి లైంగిక వేధింపుల ఘటనలను తీవ్రంగా ఖండిస్తున్నట్లు వెల్లడించింది. ఈ ఘటనలో బాధితురాలైన ఇసా బాలాడోకు అండగా ఉన్నట్లు తెలిపింది.