చిరు ఎంట్రీతో పరిష్కారానికి దారి తెరుస్తుందా టాలీవుడ్ సమస్య?
cinema | Suryaa Desk | Published : Sat, Aug 16, 2025, 11:12 PM
గత కొన్ని రోజులుగా టాలీవుడ్ చిత్ర పరిశ్రమలో షూటింగ్లు పూర్తిగా నిలిచిపోయిన సంగతి తెలిసిందే. 30 శాతం వేతన పెంపు కోసం తెలుగు ఫిలిం ఫెడరేషన్ డిమాండ్ చేస్తూ, పెంపు చేసిన నిర్మాతల సినిమాలకు మాత్రమే హాజరవుతామని యూనియన్లు స్పష్టం చేశాయి.దీంతో టాలీవుడ్లో పరిస్థితి సంక్లిష్టంగా మారింది. ఫిలిం ఛాంబర్ షూటింగ్లపై నిషేధం ప్రకటించడంతో, పరిశ్రమ మొత్తం స్థబ్ధతకు లోనైంది.ఈ పరిస్థితుల నేపథ్యంలో, మెగాస్టార్ చిరంజీవి ఫెడరేషన్ ప్రతినిధులతో భేటీ అయ్యారన్న వార్తలు బయటకు రావడంతో, ఆయన స్వయంగా స్పందించి ఆ వార్తలను ఖండించారు. అయితే తాజా సమాచారం ప్రకారం, చిరంజీవి ఇప్పుడు స్వయంగా మద్దతుగా ముందుకొస్తూ ఫెడరేషన్ ప్రతినిధులు మరియు తెలుగు నిర్మాతలతో విడిగా భేటీ కావడానికి సిద్ధమవుతున్నారు.ఈ సమావేశానికి అన్ని యూనియన్ల ప్రతినిధులను కూడా ఆహ్వానించినట్లు సమాచారం. కార్మికులు మరియు నిర్మాతలు ఇద్దరికీ నష్టంలేకుండా సమతుల్యంగా సమస్యను పరిష్కరించే దిశగా చిరంజీవి చొరవ తీసుకుంటున్నట్టు తెలుస్తోంది.ఇది మాత్రమే కాకుండా, ఇతర భాషల సినీ పరిశ్రమలలో వేతన వ్యవస్థలు ఎలా ఉన్నాయో తెలుసుకునే ప్రయత్నం కూడా ఆయన చేస్తున్నారు. అందరి అంగీకారానికి వచ్చే విధంగా, ఒక సుస్పష్టమైన వేతన నిర్మాణాన్ని ప్రతిపాదించే అవకాశముంది.గతంలో ఫెడరేషన్ నేతలు, "చిరంజీవి గారు చెప్పిన మాట మాకు తుది తీర్పు లాంటిది" అని చెప్పిన నేపథ్యంలో, రేపు జరిగే సమావేశం ద్వారా ఈ వివాదానికి ముగింపు వచ్చే అవకాశాలు స్పష్టంగా కనిపిస్తున్నాయి.
|
|