'కూలీ'లో తన పాత్రకు ఎలాంటి సంబంధం లేదన్నారు..నాగార్జున

రజనీకాంత్‌ హీరోగా నటిస్తోన్న 'కూలీ' పూర్తిస్థాయి విజిల్‌ మూవీ అన్నారు నటుడు నాగార్జున లోకేశ్‌ కనగరాజ్‌ దర్శకత్వంలో రూపుదిద్దుకుంటున్న ఈ సినిమా ప్రేక్షకులకు ఫుల్‌ ఎంటర్‌టైన్‌మెంట్‌ ఇస్తుందని తాజాగా ఇచ్చిన ఇంటర్వ్యూలో ఆయన చెప్పారు. 'కుబేర'లో తాను పోషిస్తోన్న పాత్రకు 'కూలీ'లో తన పాత్రకు ఎలాంటి సంబంధం లేదన్నారు. లుక్స్‌, బాడీ లాంగ్వేజ్‌, భాష, స్టైల్‌.. ఇలా ప్రతీ విషయంలో ఎంతో వ్యత్యాసం ఉంటుందని చెప్పారు. కుబేర గురించి మాట్లాడుతూ.. ''తెలుగు ప్రేక్షకులకు ఇష్టమైన దర్శకుల్లో శేఖర్‌ కమ్ముల ఒకరు. నాక్కూడా ఆయన అంటే అభిమానం ఉంది. ఆయన రూపొందించిన చిత్రాలన్నీ చూశా. ఆయన కథల ఎంపిక చాలా విభిన్నంగా ఉంటుంది. రొటీన్‌ జానర్‌లలో సినిమాలు చేయరు. ఒక ప్రత్యేకమైన జానర్‌లో ఆయన సినిమాలు ఉంటాయి. 'కుబేర' కథతో ఆయన నా వద్దకు వచ్చినప్పుడు.. 'శేఖర్‌.. నువ్వు నిజంగానే ఈ సినిమా చేయాలనుకుంటున్నావా?' అని ప్రశ్నించాను. ఎందుకంటే ఇది ఆయన రొటీన్‌ స్టైల్‌కు భిన్నంగా ఉంటుంది. ప్రేక్షకులను ఆలోచింపజేసే నిజాలు ఇందులో ఉన్నాయి. శేఖర్‌ కమ్ముల ఎంతో రీసెర్చ్‌ చేసి ఈ సినిమా చేశారు. ఈ సినిమాలో ఆయన చెప్పిన కొన్ని ఆసక్తికర విషయాలు విని నేనే షాక్‌ అయ్యాను. న్యాయంపై ఆయనకు బలమైన నమ్మకం ఉంది. ఏదైనా ఒక స్కామ్‌ లేదా ఏ ఒక్కరినో ఆధారంగా చేసుకొని ఈ కథ రాయలేదు. సమాజంలో చూస్తున్న విషయాలనే ఇందులో చెప్పారు. పేద, ధనిక, మధ్యతరగతి కుటుంబాల్లో ఏం జరుగుతుందనే దాన్ని ఇందులో చూపించారు. తాను అనుకున్న కథను చాలా అందంగా స్క్రీన్‌ మీదకు తీసుకువచ్చారు'' ఇక 'కూలీ' విషయానికి వస్తే.. లోకేశ్‌ కనగరాజ్‌ ఒక విజిల్‌ ఫ్యాక్టర్‌. చెన్నైలో ఆయనకు ఉన్న ఫ్యాన్‌ ఫాలోయింగ్‌ చూశా. ఆ సినిమాలో నా పాత్ర ఎంతో కీలకంగా ఉండనుంది. నన్ను స్క్రీన్‌పై చూపించిన విధానానికి లోకేశ్‌కు ధన్యవాదాలు చెప్పాలి. ఫస్ట్‌ టైమ్‌ విజువల్‌ చూసినప్పుడు ఇది నేనేనా? అనిపించింది. ఇది పూర్తిస్థాయి విజిల్‌ మూవీ. లోకేశ్‌ సినిమాల్లో పాత్రలు ఎంతో అద్భుతంగా ఉంటాయి. నాకు 'విక్రమ్‌' మూవీ అంటే ఎంతో ఇష్టం. అందులో ఫహద్‌ ఫాజిల్‌, విజయ్ సేతుపతి ఇలా ఎవరి పాత్ర చూసినా చాలా అద్భుతంగా ఉంటుంది. ఈ సినిమాలోనూ ప్రతిఒక్కరి పాత్ర గుర్తుండిపోతుంది. అదే ఈ సినిమాకు ప్లస్‌ పాయింట్‌ అని చెప్పాలి'' అని నాగార్జున తెలిపారు.