సిరీస్‌లో భాగంగా వెంకటేశ్‌..

వెంకటేశ్‌ ,రానా  ప్రధాన పాత్రల్లో నటించిన వెబ్‌ సిరీస్‌ 'రానా నాయుడు 2'.2023లో విడుదలైన 'రానా నాయుడు'కు కొనసాగింపుగా ఇది సిద్ధమైంది. శుక్రవారం నుంచి ఇది స్ట్రీమింగ్‌ కానుంది. ఈ సిరీస్‌ ప్రమోషన్స్‌లో భాగంగా ఓ ఆంగ్ల వెబ్‌సైట్‌కు రానా ఇంటర్వ్యూ ఇచ్చారు. ఇందులో పలు ఆసక్తికర విషయాలు పంచుకున్నారు. ముఖ్యంగా సిరీస్‌లో భాగంగా వెంకటేశ్‌ను అసభ్య పదజాలంతో దూషించడంపై మాట్లాడారు. ''హిందీ భాషలో కొన్ని పదాలకు నాకు సరైన అర్థం తెలియదు. పార్ట్‌ 1 కోసం హిందీ డబ్బింగ్‌ చెబుతున్నప్పుడు వాటిని కేవలం డైలాగ్స్‌ మాదిరిగానే చూశా. బాబాయ్‌ని తిడుతున్నానని అనుకోలేదు. కానీ, తెలుగు డబ్బింగ్‌కు వచ్చేసరికి చాలా ఇబ్బందిపడ్డా. కొన్ని డైలాగ్‌లు చెప్పాల్సి వచ్చినప్పుడు.. 'ఇప్పుడు ఏం చేయాలి? ఎలా ఈ డైలాగ్స్‌ చెప్పాలి' అని ఆలోచించా. నటీనటులుగా ఆయా పాత్రల్లోకి పరకాయ ప్రవేశం చేసినప్పుడు ఇలాంటివి చేయక తప్పదని అర్థం చేసుకున్నా'' అని రానా తెలిపారు. ''నటుడిగా నేను ఇండస్ట్రీలోకి అడుగుపెట్టిన నాటినుంచి ఏదోఒక ప్రాజెక్ట్‌ కోసం తప్పకుండా బాబాయ్‌తో కలిసి వర్క్‌ చేయాలని కలలు కన్నాను. ఈ సిరీస్‌తో నా కల నెరవేరింది. ఇలాంటి ప్రాజెక్ట్‌ మేమిద్దరం గతంలో ఎప్పుడూ చేయలేదు. ఇదొక విభిన్నమైన సిరీస్‌. ఒక నటుడిగా ఆయన మాలో ఎంతో స్ఫూర్తి నింపారు. సెట్‌లో నన్ను నేను మరింత మెరుగుపరచుకునేలా ఆయన చేసేవారు. ఇందులో నా పాత్ర పేరు రైనా. కానీ బాబాయ్‌ తరచూ 'రానా రానా' అని పిలిచేవారు. సెట్‌లో డైలాగ్‌ చెబుతున్నప్పుడు.. ఆయన నన్ను తిడుతున్నారో లేదా పాత్రను తిడుతున్నారో అర్థమయ్యేది కాదు'' అని అన్నారు. 'రానా నాయుడు' సిరీస్‌ను తన కుటుంబసభ్యులందరూ వీక్షించారని చెప్పారు. యాక్షన్‌ క్రైమ్‌ డ్రామాగా 'రానా నాయుడు' సిద్ధమైంది. దీనికి సుప్రన్‌ వర్మ, కరణ్‌ అన్షుమన్‌ దర్శకత్వం వహించారు. నెట్‌ఫ్లిక్స్‌ వేదికగా విడుదలైన ఈ ప్రాజెక్ట్‌ హిందీతోపాటు తెలుగులోనూ ప్రేక్షకులను అలరించింది. ఇందులో అసభ్య పదజాలం ఎక్కువగా ఉపయోగించారంటూ నెటిజన్లు ట్రోల్స్‌ కూడా చేశారు.