రాజమౌళి చిత్రం ఆర్ఆర్ఆర్' లో ప్రియమణి ?

యంగ్ టైగర్ ఎన్టీఆర్, మెగాపవర్ స్టార్ రామ్ చరణ్‌లతో దర్శకధీరుడు ఎస్.ఎస్.రాజమౌళి సినిమాను మొదలుపెట్టినప్పటి నుంచీ ఈ మల్టీస్టారర్‌పై ఏవోవో వార్తలు పుట్టుకొస్తూనే ఉన్నాయి. వాటిలో నిజమెంతో తెలియదు కానీ, ఆ వార్తలు సినిమా ప్రచారానికి బాగా పనికొస్తున్నాయి. కిందటి నెలలో లాంఛనంగా ప్రారంభించిన ఈ సినిమాపై కేవలం టాలీవుడ్‌లోనే కాదు యావత్తు భారతదేశంలో అమితాసక్తి ఉంది. ఈ సినమా ఎప్పుడెప్పుడు వస్తుందా అని ఇటు ఎన్టీఆర్ అభిమానులతో పాటు.. అటు రామ్ చరణ్ ఫ్యాన్స్ వేయి కళ్లతో ఎదురుచూస్తున్నారు. 

ఇదిలా ఉంటే, ఈ సినిమాకు సంబంధించి ఇప్పటి వరకు ఎన్టీఆర్, రామ్ చరణ్ తప్ప మిగిలిన నటీనటుల సంగతి తెలీదు. చిత్ర యూనిట్ కూడా వెల్లడించలేదు. అయితే, మాజీ హీరోయిన్ ప్రియమణి ‘RRR’లో ఓ ముఖ్యపాత్రలో కనిపించనుందనే ప్రచారం ప్రస్తుతం టాలీవుడ్‌లో ఊపందుకుంది. గతంలో ఎన్టీఆర్ హీరోగా రాజమౌళి తెరకెక్కించిన ‘యమదొంగ’లో ప్రియమణి హీరోయిన్‌గా నటించింది. అప్పట్లో ఈ సినిమా ప్రియమణికి మంచి గుర్తింపు తెచ్చిపెట్టింది. ఆ తరవాత కొంత మంది స్టార్ హీరోలతో ప్రియమణి నటించింది. వివాహం తరవాత ప్రియమణి నటనకు దూరం కావడంతో మళ్లీ వెండితెరపై కనిపించలేదు. 

ఇప్పుడు ‘RRR’ సినిమా ద్వారా ప్రియమణి మరోసారి తెలుగు ప్రేక్షకుల్ని పలకరించనుందని అంటున్నారు. ఈ చిత్రంలో పవర్‌ఫుల్ లేడీ విలన్‌గా ప్రియమణి కనిపించనుందనే వార్తలు వస్తున్నాయి. దీనిలో నిజమెంతో తెలియాలంటే అధికారిక ప్రకటన వచ్చే వరకు ఆగాల్సిందే. ఈ సినిమాకు విజయేంద్ర ప్రసాద్ కథ అందించారు. యం.యం.కీరవాణి సంగీతం సమకూరుస్తున్నారు. సెంథిల్ కుమార్ సినిమాటోగ్రఫీ అందిస్తున్నారు.