రూటు మారుస్తున్న మజిలీ దర్శకుడు... హిట్ కోసమేనా ...!

నాని, నివేదా థామస్ జంటగా నటించిన నిన్ను కోరి, నాగ చైతన్య, సమంత జంటగా నటించిన మజిలీ సినిమాలతో బ్యాక్ టు బ్యాక్ రెండు హిట్ సినిమాలతో టాలీవుడ్ లో మంచి దర్శకుడిగా పేరు తెచ్చుకున్నాడు శివ నిర్వాణ. మూడో ప్రయత్నంగా చేసిన టక్ జగదీశ్ నిరాశపరచటంతో మళ్ళీ హిట్ ట్రాక్ లోకి రావటానికి ఒక క్రేజీ మూవీని చేయబోతున్నట్టు టాక్. అదే... రౌడీ హీరో విజయ్ దేవరకొండ, సమంత జంటగా నటించబోతున్న ఒక క్యూట్ లవ్ స్టోరీ. అధికారికంగా ఎనౌన్స్ చేయనప్పటికీ  ఈ మూవీపై రోజుకొక కొత్త వార్త వస్తూనే ఉంది. లెజెండరీ దర్సకుడు మణిరత్నం "రోజా"ను ఈ తరం వారికి కొత్తగా ఈ సినిమా ద్వారా చూపించబోతున్నట్టు, పవర్ స్టార్ పవన్ కళ్యాణ్ ఇండస్ట్రీ బ్లాక్ బస్టర్ హిట్ ఖుషీ ను ఈ సినిమాకి టైటిల్ గా పెట్టబోతున్నట్టు.... ఇలా పలురకాల వార్తలను రోజూ వింటూనే విన్నాం. అయితే తాజాగా ఈ మూవీపై మరొక వార్త చిత్రపరిశ్రమలో చక్కర్లు కొడుతుంది. అదేంటంటే... ఈ ఏడాదిలో విడుదలై సెన్సేషన్ క్రియేట్ చేసిన మలయాళ చిత్రం 'హృదయం' సంగీత దర్శకుడు హేశం అబ్దుల్ వాహబ్ ను నిర్వాణ తన కొత్త సినిమాకు మ్యూజిక్ డైరెక్టర్ గా తీసుకోబుతున్నట్టు టాక్. హృదయం మూవీ ఆడియో ఆల్బమ్ మలయాళంలో సూపర్ డూపర్ హిట్ అయ్యింది. దర్శనా... అనే పాట అయితే సోషల్ మీడియాలో ఓ రేంజులో విజృంభిస్తుంది. అలాంటి కంపోజర్ ను నిర్వాణ తన సినిమాతో టాలీవుడ్ కి పరిచయం చేయబోతున్నట్టు తెలుస్తోంది. ఇప్పటివరకు తను డైరెక్ట్ చేసిన మూడు సినిమాలకు గోపి సుందర్ చేత మ్యూజిక్ కంపోజ్ చేయించుకున్న నిర్వాణ ఇప్పుడు రూటు మార్చి కొత్త కంపోజర్ ను ఎంచుకోవటం ఆసక్తికరంగా మారింది. ఈ సారి ఎలా అయినా హిట్ కొట్టాలని భీష్మ ప్రతిజ్ఞ చేసుకున్నట్టు తెలుస్తోంది. అందుకే ఎక్కడా రాజీ పడకుండా, సెంటిమెంట్లకు లోనవ్వకుండా విజయానికి కావలసిన అన్ని ఏర్పాట్లను చేసుకుంటున్నాడని అనుకుంటున్నారు.