సైబర్ క్రైమ్ పోలీసులకు లావణ్య త్రిపాఠి ఫిర్యాదు

సోది స్టార్ సునిశిత్..! శాక్రిఫైజ్ స్టార్ సునిశిత్..! యూట్యూబ్, టిక్ టాక్ వీడియోలు చూసేవారికి ఈ పేరు పరిచయం ఉండే ఉంటుంది. అంతలా సోది కబుర్లు చెప్పి యూబ్యూబ్‌లో ట్రెండ్ అవుతున్నాడు. మహేష్ బాబు '1 నేనొక్కడినే', జూనియర్ ఎన్టీఆర్ 'నాన్నకు ప్రేమతో..' పాటు పలు సినిమాల్లో మనోడికే ముందు అవకాశం వచ్చిందంట. కానీ హీరోలు ఒత్తిడి చేయడంతో డైరెక్టర్లు తనను మోసం చేశానని పలు యూట్యూబ్ ఇంటర్వ్యూల్లో చెప్పాడు. అంతేకాదు జబర్దస్త్ స్టార్ సుధీర్, బుల్లితెర యాంకర్ ప్రదీప్, హీరో రవితేజపై కేసులు కూడా పెట్టానని.. బాహుబలి సినిమాలో పాట పాడానని ఎన్నో కహానీలు చెబుతున్నాడు సునిశిత్. అంతటితో ఆగక.. హీరోయిన్లు తమన్నా, లావణ్య త్రిపాఠితో లవ్ ఎఫైర్లు కూడా నడిపించానని కాంట్రవర్సీ కామెంట్స్ చేశాడు. మరో అడుగు ముందుకేసి లావణ్య త్రిపాఠిని ఇదివరకే పెళ్లి చేసుకున్నానని..కొన్ని కారణాల వల్ల విడిపోవాల్సి వచ్చిందంటూ తెగ ప్రచారం చేశాడు. ఆధారాలు అడిగితే మాత్రం నీళ్లు నములుతాడు.
ఇలా నిత్య ఏదో ఓ యూట్యూబ్ ఛానెల్‌కి ఇంటర్వూ ఇవ్వడం, ఆ క్లిప్ టిక్‌టాక్‌లో వైరల్ అవడం... కొన్ని రోజులుగా జరుగుతోంది. ఆ వీడియోలు చివరకు లావణ్య త్రిపాఠి దృష్టికి వెళ్లాయి. ఈ క్రమంలోనే ఆమె సైబర్ క్రైమ్ పోలీసులకు ఫిర్యాదు చేశారు. సునిశిత్ అనే వ్యక్తి తనపై అసత్య ప్రచారం చేస్తున్నాడని తన అసిస్టెంట్ ద్వారా పోలీసులను ఆశ్రయించారు. లావణ్య ఫిర్యాదుపై స్పందించిన పోలీసులు.. ఆడవారిపై అసభ్యంగా మాట్లాడితే జైలుకెళ్లక తప్పదని హెచ్చరించారు. యూట్యూబ్‌ చానెల్స్ లో సునిషిత్ చేసిన వ్యాఖ్యలను పరిశీలించామని.. అతడు ఇతర నటులపైనా కామెంట్స్ చేశారని పేర్కొన్నారు. ఐతే ఇప్పటి వరకు లావణ్య మాత్రమే ఫిర్యాదు చేసారని చెప్పుకొచ్చారు. ఇప్పటికే కేసు నమోదు చేశామని.. ఆధారాలు సేకరించి దర్యాప్తు చేస్తామని స్పష్టం చేశారు.