జబర్దస్త్‌లో ఎంట్రీ ఇచ్చిన రమణా లోడ్ ఎత్తాలిరా ఫెమ్ సేతురామన్

ఒక్క ఛాన్స్ అంటూ సినిమాల్లోకి అవకాశాల కోసం వచ్చేవారికి సినిమాలో ఎలా అయిన గుర్తింపు రావచ్చు. కొందరు పాత్రల ద్వారా ఫేమస్ అవుతే మరికొందరు డైలాగ్స్ వల్ల ఫేమస్ అవుతారు. రాజేంద్రుడు గజేంద్రుడు చిత్రం ద్వారా అలీ ఏందా చాట అనే ఒకే ఒక డైలాగ్ తో ఫేమస్ అయ్యాడు. ఇక ఇలా చెప్పుకుంటే పోతే చాలా మందే ఉన్నారు. ఇప్పుడు అలంటి జాబితాలోకి కుమనన్ సేతురామన్ కూడా చేరిపోయారు . రమణ లోడ్ ఎత్తాలిరా.. ఈ డైలాగ్ తెలియని తెలుగు ప్రేక్షకుడు ఉండడేమో ఇప్పుడు. సరిలేరు నీకెవ్వరు సినిమాలో అనిల్ రావిపూడి రాసిన ఈ ఒక్క డైలాగ్ ఇప్పుడు ధారాళంలా వ్యాపించింది. ఒక్క డైలాగుతోనే ఇంత ఫేమస్ అవ్వొచ్చా అనేలా పేలిపోయింది ఈ రమణ లోడ్ ఎత్తాలిరా మాట. ఈ సినిమాలో ఈ ఒక్క డైలాగుతోనే తన స్థాయిని పెంచేసుకున్నాడు ఓ ముసలాయన. అసలు అంతకుముందు ఎప్పుడూ వెండితెరపై చూసినట్లు కూడా ఉండని మొహం అది.. కానీ 30 ఏళ్లుగా ఇండస్ట్రీలోనే ఉన్నాడు. ఇప్పటి వరకు చాలా సినిమాలు చేసాడు.. కానీ అందులో కూడా ఒక్కటంటే ఒక్కటి కూడా గుర్తింపు తెచ్చిన పాత్ర లేదు. సైరాలో నిహారిక తండ్రిగా నటించింది కూడా ఈయనే.

ఆ ముసలాయన గురించి ఇప్పుడు సోషల్ మీడియాలో బాగా వెతికేస్తున్నారు నెటిజన్లు. ఇంతకీ ఎవరాయనా.. ఎక్కడ్నుంచి వచ్చాడంటూ.. ఆయన అసలు పేరు కుమనన్ సేతురామన్.. సొంత రాష్ట్రం తమిళనాడు. అయితే 1984లోనే వైజాగ్‌లో సెటిల్ అయిపోయాడు కుమనన్. ఆయన భార్య పేరు మహాలక్ష్మి. స్వతహాగా ఎలక్ట్రికల్ ఇంజనీర్ అయిన కుమనన్.. సినిమాలపై మోజుపై హైదరాబాద్ వచ్చాడు. ఇక్కడ చాలా ఏళ్ల పాటు ట్రై చేసాడు కానీ అదృష్టం కలిసిరాలేదు. అల్లుడు శీనులో బాబాగా వచ్చేది కూడా ఈయనే.. ఆ తర్వాత సైరాలో నిహారిక తండ్రిగా నటించాడు. దాంతో పాటే పదుల సంఖ్యలో సినిమాలు చేసాడు కానీ ఒక్కటి కూడా కోరుకున్న గుర్తింపు అయితే తీసుకురాలేదు.
అలాంటి సమయంలో వచ్చిన సినిమా సరిలేరు నీకెవ్వరు.. మహేష్ బాబు హీరోగా వచ్చిన ఈ చిత్రంలో 5 నిమిషాల పాటు కనిపించే పాత్రలో నటించాడు కుమనన్. రమణా లోడ్ ఎత్తాలిరా.. చెక్‌పోస్ట్ పడతాది అంటూ వెరైటీగా ఈయన చెప్పిన డైలాగ్ బాగా పేలింది. దానికితోడు చూడ్డానికి కూడా ఫిజిక్ అద్భుతంగా ఉండటంతో ఎవరీ ముసలాయనా అంటూ అంతా ఆయన గురించి వెతకడం మొదలుపెట్టారు.
ఇక ఇప్పుడు ఈయన జబర్దస్త్ కామెడీ షోలోకి కూడా ఎంట్రీ ఇచ్చాడు. తాజాగా ముక్కు అవినాష్ స్కిట్‌లో ఈయన కనిపించాడు. రమణ లోడ్ ఎత్తాలిరా అంటూ ఆయన చెబుతుంటే.. నన్ను ఎత్తరా అంటూ మాస్ అవినాష్, కెవ్వు కార్తిక్ ఆయనతో కామెడీ చేసారు. ఈ స్కిట్ బాగానే పేలేలా కనిపిస్తుంది. వచ్చే వారం ఎపిసోడ్ ప్రోమోలో రమణా లోడ్ ఎత్తాలిరా డైలాగ్ బాగా హైలైట్ అయింది. ఇప్పటికే చాలా మంది నటులు జబర్దస్త్‌లో కనిపించారు. మరిప్పుడు సేతురామన్ ఏం చేస్తాడో చూడాలిక.