బిగ్ బాస్ సీజన్ 3 లో ప్రధాన లోపం ఇదే..!

తెలుగులో నంబర్ 1 రియాలిటీ షోగా వెలుగొందుతున్న బిగ్ బాస్ సీజన్ 3 షో మూడు వంతులు పూర్తయ్యింది. మరో నెల రోజులు మాత్రమే మిగిలి ఉంది. 100 రోజుల పాటు ఉండి ట్రోఫీ గెలిచేదెవరు అనే ఆసక్తి ప్రేక్షకుల్లో పెరిగిపోయింది. అయితే ప్రస్తుతం ఉన్న ఫాలోయింగ్ క్రేజ్ ప్రకారం చూస్తే శ్రీముఖి వరుణ్ తేజ్ రాహుల్ సిప్లిగుంజ్ వంటి ముగ్గురిలో ఒకరికి టైటిల్ ఖాయమన్న అంచనాలు నెలకొన్నాయి. బిగ్ బాస్ తెలుగు సీజన్ ఫైనల్ అంకానికి చేరుతోంది. జస్ట్ మరో ఐదు వారాలే.. మరి ఇప్పుడు ఎలా ఉండాలి. ఆట రంజుగా మారాలి. కానీ ఇక్కడే బిగ్ బాస్ సీజన్ 3 తేలిపోతుందన్న విమర్శలు వ్యక్తమవుతున్నాయి.

మొదటి సీజన్ ఫుణెలో జరగడం.. తొలిసారి కావడంతో ఏం చేయాలో అర్థం కాక గొడవలు - జెన్యూన్ గా ఆడి ప్రేక్షకులను రక్తి కట్టింది. ఇక రెండో సీజన్ లో కౌశల్ ను ఒంటరి చేసి హౌస్ మేట్స్ ఆడిన గేమ్ లు - విభజన - గొడవలు షోన్ పీక్ స్టేజీకి తీసుకెళ్లాయి.

కానీ మూడో సీజన్ కు వచ్చేసరికి మాత్రం పూర్తిగా తేడా కొడుతోంది. నిర్వాహకులు ఎంత గొడవలు పెట్టడానికి ట్రై చేయడానికి  ఫలితం కనిపించడం లేదు. రెండు సీజన్లను అవపోసన పట్టిన ప్రస్తుత బిగ్ బాస్ కంటెస్టెంట్స్ చాలా తెలివిగా గేమ్ ఆడుతున్నారు. నొప్పింపక తానొవ్వక అన్నట్టు బిగ్ బాస్ ఇంట్లో గొడవలు పెట్టుకోకుండా ఫ్రెండ్స్ షిప్ పెట్టుకుంటూ గ్రూపులు కట్టుకుంటూ ఆటలోని మజాను బయటకు తీయడం లేదు.  వారు గేముల్లో చిత్తశుద్ధి పోటీతత్వం కనబరచడం లేదు. గొడవలు జరగడం లేదు. బిగ్ బాస్ టీం ఎంత ఎడిటింగ్ స్కిల్స్ తో వివాదాలు జరుగుతున్నాయని ప్రోమోలు చూపిస్తున్నా ఆ తీవ్రత గొడవలో కనిపించకపోవడంతో ప్రేక్షకులు నిరుత్సాహ పడుతున్నారు. చప్పగా సాగుతున్న షోకు రేటింగ్ కూడా తగ్గుతున్నట్టు వినికిడి.

నిన్నటి సోమవారం ఎపిసోడ్ లో కూడా మొన్న వారమే కొట్టుకున్న రాహుల్ - వరుణ్ - వితికలు కలిసిపోయి కలిసికట్టుగా గేమ్ ఆడారు. మహేష్ తో గొడవ పడుతున్న రాహుల్ ను వరుణ్ సర్ధిచెప్పి ఊరుకోబెట్టాడు. ఇలా రక్తకట్టాల్సిన గేమ్స్ ఫ్రెండ్ షిప్ ల వల్ల ముందుకు సాగడం లేదు. బలమైన పోటీదారులు లేకపోవడం కూడా ప్రేక్షకులకు విసుగుపుట్టడానికి కారణమవుతోంది. బిగ్ బాస్ ఇంట్లో స్నేహ గీతాలు - గ్రూపుల వల్ల వారిది వారు రక్షణాత్మక ఆటతో బిగ్ బాస్ ఇంట్లో ఎలాంటి అలజడులు లేకుండా షో నీరుగారుతోందన్న అనుమానాలు బలంగా వినిపిస్తున్నాయి