చేతిలో రెండు నెలల బిడ్డతో ఎత్తైన పర్వతాన్ని ఎక్కిన సమీరా రెడ్డి

ఏదేమైనా బాలీవుడ్ భామ సమీరా రెడ్డికి ధైర్యం ఎక్కువేనండోయ్. లేకపోతే.. పర్వతాన్ని అధిరోహించడమే ఒక ఎత్తైతే.. చేతిలో రెండు నెలల బిడ్డను పెట్టుకుని మరీ ఎక్కితే ఇంకేమైనా ఉందా? కానీ సమీరా మాత్రం భయపడకుండా పర్వతాన్ని ఎక్కేశారు. ఇటీవల సమీరా పండండి ఆడబిడ్డకు జన్మనిచ్చారు. ఫ్యామిలీ వెకేషన్‌లో భాగంగా సమీరా ప్రస్తుతం కర్ణాటకలో ఉన్నారు. అక్కడ ముల్లయనగిరి అనే ఎత్తైన పర్వతం ఒకటి ఉంది. దానిని చూడంగానే సమీరాలో ఉత్సాహం పొంగుకొచ్చిందో ఏమో చేతిలో పసి పిల్ల ఉందన్న ఆలోచన కూడా లేకుండా పర్వతాన్ని ఎక్కేసింది. అది చాలదన్నట్లు ఆ సమయంలో తీసిన వీడియోను ఇన్‌స్టాగ్రామ్‌లో పోస్ట్ చేసింది. ‘నైరా(పాప పేరు)ను ఎత్తుకుని ముల్లనయగిరి పర్వతాన్ని ఎక్కేశాను. ఎక్కుతున్నప్పుడు మధ్యలో ఆగాల్సి వచ్చింది. ఎందుకంటే మధ్యలో ఊపిరి పీల్చుకోలేకపోయా. కర్ణాటకలోనే ఇది ఎత్తైన పర్వతం. దీని ఎత్తు 6300 అడుగులు. కొత్తగా తల్లైన చాలా మంది మహిళలు అన్ని ప్రాంతాలను పర్యటించాలని చాలా ఆరాటపడుతుంటారు. వారిలో నేనూ ఒకదానిని. నా ట్రావెల్ స్టోరీస్ సోషల్ మీడియాలో పోస్ట్ చేస్తున్నందుకు మంచి స్పందనే వస్తోంది. అందుకు చాలా సంతోషంగా ఉంది. బిడ్డ పుట్టాక మనం చేయాలనుకున్నవి చేయలేకపోతామన్న బాధ ఉండిపోతుంది. ఆ బాధ నాలో ఏమాత్రం ఉండకుండా చూసుకుంటున్నా’ అని వెల్లడించారు సమీరా. అయితే ఇలా చంటిబిడ్డను మోసుకుని పర్వతాన్ని ఎక్కడం అనేది మంచి పద్ధతి కాదని, పైగా పర్వతం ఎక్కుతున్న సమయంలో ఊపిరి ఆడక పడిపోయి ఉంటే ఎంత ఘోరం జరిగి ఉండేదంటూ కొందరు నెటిజన్లు సమీరాను తిట్టిపోస్తున్నారు. ఆమెను స్ఫూర్తిగా తీసుకుని మరెవరైనా ఇలాంటి ప్రయత్నాలు చేస్తే ఆ తర్వాత జరగరానిది ఏదన్నా జరిగితే ఎవరు బాధ్యులు అని ప్రశ్నిస్తున్నారు. ఈ విన్యాసం చేయడానికి ముందు ఆమె ఎన్నైనా జాగ్రత్తలు తీసుకుని ఉండొచ్చు. కానీ చేతిలో బిడ్డను వేసుకుని అలాంటి విన్యాసాలకు పాల్పడటం మంచిది కాదనే చెప్పాలి. ఏదేమైనా సమీరా ధైర్యాన్ని మెచ్చుకోవాల్సిందే. తెలుగులో సమీరా యంగ్ టైగర్ ఎన్టీఆర్‌తో కలిసి ‘నరసింహుడు’, ‘ అశోక్’ సినిమాల్లో నటించారు. చిరంజీవితో కలిసి ‘జై చిరంజీవ’, సూర్యతో కలిసి ‘సూర్య సన్నాఫ్ కృష్ణన్ సినిమాల్లో నటించారు. సమీరా చివరిగా ‘వరదనాయక’ అనే కన్నడ సినిమాలో నటించారు. ఆ తర్వాత ఆమె ముంబయికి చెందిన వ్యాపారవేత్త అక్షయ్ వర్దేను వివాహం చేసుకున్నారు. దాంతో పూర్తిగా సినిమాలకు దూరమయ్యారు. సమీరాకు ఇద్దరు పిల్లలు ఉన్నారు. ప్రస్తుతం ఆమె తన కుటుంబం కోసమే సమయాన్ని కేటాయిస్తున్నారు.