ఈ నెల 13 నుంచి ఓటీటీలో స్ట్రీమింగ్ కానున్న 'కపుల్ ఫ్రెండ్లీ'
cinema | Suryaa Desk | Published : Wed, Mar 11, 2026, 11:54 AM
హీరో సంతోష్ శోభన్, మాజీ మిస్ ఇండియా మానస వారణాసి జంటగా నటించిన రొమాంటిక్ డ్రామా 'కపుల్ ఫ్రెండ్లీ' ఓటీటీ ప్రేక్షకులను పలకరించేందుకు సిద్ధమైంది. ప్రేమికుల రోజు కానుకగా థియేటర్లలో విడుదలైన ఈ చిత్రం, మార్చి 13 నుంచి ప్రముఖ ఓటీటీ ప్లాట్ఫామ్ అమెజాన్ ప్రైమ్ వీడియోలో స్ట్రీమింగ్ కానుంది. తెలుగుతో పాటు తమిళ భాషలోనూ ఈ సినిమా అందుబాటులో ఉండనుంది.అశ్విన్ చంద్రశేఖర్ దర్శకత్వం వహించిన ఈ యూత్ఫుల్ ఎంటర్టైనర్, నగరాల్లో ఉద్యోగాల కోసం కష్టపడుతున్న యువతరం జీవితాలను, వారి మధ్య చిగురించే ప్రేమను సహజంగా ఆవిష్కరించింది. థియేటర్లలో యువతను బాగా ఆకట్టుకున్న ఈ సినిమా కథాంశం ఆసక్తికరంగా సాగుతుంది.నేటితరం యువత ఎదుర్కొంటున్న కెరీర్ సమస్యలు, ప్రేమ, సహజీవనం వంటి అంశాల చుట్టూ అల్లుకున్న కథ ఇది. చెన్నైలో ఇంటీరియర్ డిజైనర్గా స్థిరపడాలనుకునే శివ (సంతోష్ శోభన్), ఐటీ ఉద్యోగం కోసం ప్రయత్నించే మిత్ర (మానస వారణాసి) తమ లక్ష్యాల కోసం పోరాడుతుంటారు. అవకాశాలు రాక ఇబ్బంది పడుతున్న సమయంలో వీరిద్దరూ కలుస్తారు.ఒకే రకమైన లక్ష్యాలు, సమస్యలతో సతమతమవుతున్న శివ, మిత్ర అనుకోని పరిస్థితుల్లో ఒకే ఇంట్లో కలిసి ఉండాల్సి వస్తుంది. పెళ్లి కాకుండానే వారి మధ్య మొదలైన ఈ సహజీవనం ఎలాంటి మలుపులు తీసుకుంది? వారిద్దరి మధ్య ప్రేమ ఎలా పుట్టింది? ఉద్యోగాల వేటలో వారు పడిన కష్టాలు ఫలించాయా? చివరికి వారి ప్రేమకథ సుఖాంతం అయిందా లేదా? అనే ఆసక్తికరమైన అంశాలతో ఈ సినిమా సాగుతుంది.
|
|