నా పాత్రకు మంచి ప్రాధాన్యం ఉంది
cinema | Suryaa Desk | Published : Thu, Sep 26, 2019, 12:53 PM
నటన, మోడలింగ్ అంటే నాకు చాలా ఇష్టం. అందుకే ఆ రెండింటినీ సమన్వయం చేసుకుంటూ ముందుకు సాగాలని అనుకుంటున్నాను అని నూతన కథానాయిక స్టెఫీ పటేల్ అన్నారు. వంశీ యాకసిరి, స్టెఫీ పటేల్ జంటగా అనిల్ తోట దర్శకత్వంలో రూపొందిన నిన్ను తలచి చిత్రం విడుదలకు సిద్ధమైంది. ఈ సందర్భంగా స్టెఫీ పటేల్ మాట్లాడుతూ, మాది జార్ఖండ్లోని అజారిబాగ్. ఢిల్లి యూనివర్శిటీలో ఇంగ్లీష్ లిటరేచర్ చేశాను. గతంలో మిస్ టీన్ ఇండియా ఇంటర్నేషనల్ వంటి పలు ఫ్యాషన్ పోటీల్లో పాల్గొన్నాను. సినీరంగంలోకి రావాలనుకున్నప్పుడు ఇంట్లో వాళ్లు చదువు పూర్తిచేసి వెళ్లమని సూచించారు. ఓ వైపు మోడలింగ్ చేస్తూనే లఘు చిత్రాలు చేశాను. అదే సమయంలో హిందీలో లవ్స్ట్రీట్ అనే చిత్రంలో అవకాశం వచ్చింది. దీని తర్వాత చైనీస్-హాలీవుడ్ చిత్రంలో ప్రధాన పాత్రలో నటిస్తున్నాను. తెలుగులో మాత్రం ఇదే తొలి చిత్రం. టాలీవుడ్ చాలా కలర్ఫుల్గా ఉంటుంది. ఇక ఈ సినిమా కథ విషయానికి వస్తే…తండ్రీ కూతుళ్ళ మధ్య, తండ్రీ తనయుల మధ్య అనుబంధం నేపథ్యంలో వినోదం, భావోద్వేగాల మేళవింపుతో సాగే చిత్రమిది. కథానాయకుడికి, నాకు మధ్య ప్రేమ ప్రయాణం ఎలా సాగింది? ఎన్ని మలుపులు తీసుకుందన్న అంశాన్ని తెరపై చూడాల్సిందే. ఇందులో కథానాయికగా అంకిత అనే పక్కింటి అమ్మాయి తరహా పాత్ర పోషించాను. నా పాత్రకు మంచి ప్రాధాన్యం ఉంది అన్నారు.
|
|