సాంకేతిక హంగులతో రీ-రిలీజ్‌కు సిద్ధమైన ‘కొదమసింహం’

మెగాస్టార్ చిరంజీవి నటించిన ట్రెండ్‌సెట్టర్ చిత్రాలలో ‘కొదమసింహం’కు ప్రత్యేక స్థానం ఉంది. తెలుగు తెరపై వచ్చిన పూర్తిస్థాయి కౌబాయ్ చిత్రంగా అప్పట్లో సంచలనం సృష్టించిన ఈ సినిమా ఇప్పుడు కొత్త హంగులతో మళ్లీ ప్రేక్షకులను పలకరించేందుకు సిద్ధమైంది. ఈ క్లాసిక్ చిత్రాన్ని 4K క్వాలిటీతో రీ-మాస్టర్ చేసి, నవంబర్ 21న థియేటర్లలో గ్రాండ్‌గా రీ-రిలీజ్ చేయనున్నట్లు మెగాస్టార్ చిరంజీవి స్వయంగా ప్రకటించారు.ఈ సందర్భంగా ఆయన సోషల్ మీడియా వేదికగా తన పాత జ్ఞాపకాలను పంచుకున్నారు. “కొదమసింహం నా కెరీర్‌లో ఒక సాహసోపేతమైన ప్రయాణం. ఇది నాకొక మరపురాని ఆల్బమ్ కూడా. ఈ సినిమా షూటింగ్ సమయంలో ఎన్నో మధుర జ్ఞాపకాలు ఉన్నాయి. ఇప్పుడు ఈ చిత్రాన్ని 4Kలో రీ-మాస్టర్ చేసి నవంబర్ 21న థియేటర్లలోకి తీసుకురావడం చాలా ఆనందంగా ఉంది. మీ అందరి కోసం రీ-రిలీజ్ ట్రైలర్‌ను పంచుకుంటున్నాను” అంటూ చిరంజీవి ట్వీట్ చేశారు.కె. మురళీ మోహన్ రావు దర్శకత్వంలో తెరకెక్కిన ఈ చిత్రంలో చిరంజీవితో పాటు మోహన్ బాబు, రాధ, బాలీవుడ్ నటుడు ప్రాణ్, కైకాల సత్యనారాయణ వంటి ప్రముఖ నటులు కీలక పాత్రలు పోషించారు. రామా ఫిలింస్ బ్యానర్‌పై కె. నాగేశ్వరరావు నిర్మించిన ఈ సినిమాకు రాజ్-కోటి అందించిన సంగీతం అప్పట్లో బ్లాక్‌బస్టర్‌గా నిలిచింది. సత్యానంద్, పరుచూరి బ్రదర్స్, విజయేంద్ర ప్రసాద్ వంటి ప్రముఖ రచయితలు ఈ చిత్రానికి పనిచేశారు.ప్రస్తుత ట్రెండ్‌కు అనుగుణంగా ప్రసాద్ ఫిల్మ్ ల్యాబ్స్‌లో ఈ చిత్రాన్ని 4K రీస్టొరేషన్‌తో పాటు 5.1 సౌండ్‌తో డిజిటల్ రీ-మాస్టరింగ్ చేశారు. మెగాస్టార్‌ను కౌబాయ్ గెటప్‌లో, ఆయనదైన స్లిక్ యాక్షన్‌తో మరోసారి వెండితెరపై చూసేందుకు అభిమానులు ఎంతో ఆసక్తిగా ఎదురుచూస్తున్నారు.