మిరాయ్’ సినిమాకు ప్రేక్షకుల డిమాండ్.. ‘వైబ్ అండీ’ పాట చేరిక
cinema | Suryaa Desk | Published : Tue, Sep 23, 2025, 08:26 PM
బాక్సాఫీస్ వద్ద భారీ వసూళ్లతో దూసుకెళుతున్న ‘మిరాయ్’ చిత్రబృందం, ప్రేక్షకుల నుంచి వచ్చిన డిమాండ్కు అనుగుణంగా కీలక నిర్ణయం తీసుకుంది. సినిమా ప్రమోషన్లలో భాగంగా విడుదలై చార్ట్బస్టర్గా నిలిచిన ‘వైబ్ అండీ’ పాటను నేటి నుంచి థియేటర్లలో ప్రదర్శించనున్నట్లు అధికారికంగా ప్రకటించింది. ఈ నిర్ణయంతో, ఇప్పటికే సినిమా చూసిన ప్రేక్షకులు సైతం మళ్లీ థియేటర్లకు వచ్చే అవకాశం ఏర్పడింది.ప్రపంచవ్యాప్తంగా రూ. 134 కోట్లకు పైగా వసూళ్లు సాధించిన ఈ సినిమా, మౌత్ టాక్తో విజయవంతంగా ప్రదర్శితమవుతోంది. అయితే, ప్రమోషన్ల సమయంలో యూట్యూబ్లో యువతను ఉర్రూతలూగించిన ‘వైబ్ అండీ’ పాట సినిమాలో లేకపోవడంపై చాలామంది అభిమానులు సోషల్ మీడియా వేదికగా నిరాశ వ్యక్తం చేశారు. వేగంగా సాగే కథనానికి ఈ పాట అడ్డంకిగా మారుతుందనే ఉద్దేశంతో తొలగించినట్లు దర్శకుడు కార్తిక్ గతంలో వివరించారు.అయినప్పటికీ, ప్రేక్షకుల నుంచి వస్తున్న విజ్ఞప్తులను పరిగణనలోకి తీసుకున్న చిత్ర నిర్మాణ సంస్థ, మనసు మార్చుకుంది. మంగళవారం నుంచి ప్రపంచవ్యాప్తంగా ‘మిరాయ్’ ఆడుతున్న అన్ని షోలలోనూ ఈ పాటను జతచేస్తున్నట్లు స్పష్టం చేసింది. గౌర హరి స్వరాలు సమకూర్చిన ఈ పాటకు కృష్ణకాంత్ సాహిత్యం అందించగా, అర్మాన్ మాలిక్ ఆలపించారు.ప్రస్తుతం బాక్సాఫీస్ వద్ద పెద్దగా పోటీ లేకపోవడంతో, ఈ కొత్త మార్పు ‘మిరాయ్’ సినిమాకు మరింత కలిసొస్తుందని విశ్లేషకులు అంచనా వేస్తున్నారు. ఈ పాట చేరికతో యువత థియేటర్లకు మళ్లీ క్యూ కడతారని, ఇది కలెక్షన్లను మరింత పెంచుతుందని చిత్రబృందం ధీమా వ్యక్తం చేస్తోంది.
|
|