గూగుల్ తర్వాత విశాఖకు మరో శుభవార్త.. ఈ నెలలోనే.. ముహూర్తం ఫిక్స్!

విశాఖవాసులకు త్వరలోనే మరో శుభవార్త అందనుంది. విశాఖపట్నంలో గూగుల్ డేటా సెంటర్ ఏర్పాటుకు ఒప్పందం జరిగిన సంగతి తెలిసిందే. అయితే మరో అంతర్జాతీయ కంపెనీ ఇప్పుడు విశాఖకు రానుంది. విశాఖలో లులు షాపింగ్ మాల్ ఏర్పాటు కానుంది. లులూ మెగా షాపింగ్ మాల్ నిర్మాణం కోసం ఏపీ ప్రభుత్వం విశాఖలో ఇప్పటికే భూమిని కూడా కేటాయించింది. అయితే ఈ నెలలోనే విశాఖలో లులు షాపింగ్ మాల్ నిర్మాణానికి శంకుస్థాపన జరగనున్నట్లు సమాచారం. నవంబర్ 14,15వ తేదీలలో విశాఖలో సీఐఐ భాగస్వామ్య సదస్సు జరగనుంది. ఈ సదస్సు సందర్భంగా సీఎం నారా చంద్రబాబు నాయుడు విశాఖలో లులూ మెగా షాపింగ్ మాల్ నిర్మాణానికి శంకుస్థాపన చేస్తారంటూ వార్తలు వస్తున్నాయి.

లులు ఇంటర్నేషనల్ షాపింగ్ మాల్స్ ప్రైవేట్ లిమిటెడ్‌కు విశాఖ బీచ్‌ రోడ్డులోని హార్బర్‌ పార్క్‌లో ఏపీ ప్రభుత్వం భూమిని కేటాయించింది. 13.74 ఎకరాల భూమిని 99 ఏళ్ల లీజు ప్రాతిపదికన కేటాయించింది. ఇందులో 13.5 లక్షల చదరపు అడుగుల విస్తీర్ణంలో లులు మెగా షాపింగ్‌ మాల్‌ నిర్మించనున్నారు. ఈ మెగా షాపింగ్ మాల్‌లో.. లులు సూపర్‌మార్కెట్, లులు కనెక్ట్, లులు ఫ్యాషన్, ఫ్యామిలీ ఎంటర్‌టైన్‌మెంట్‌ సెంటర్‌, అమ్యూజ్‌మెంట్ పార్కు, 8 స్ర్కీన్ల మల్టీప్లెక్స్, ఫుడ్ కోర్టు వంటివి ఏర్పాటు చేస్తారు. లులు మెగా షాపింగ్ మాల్ ఏర్పాటు వలన 5 వేల నుంచి 8 వేల మందికి ఉపాధి అవకాశాలు లభిస్తాయని అంచనా. మరోవైపు విశాఖలో ఇప్పటికే గూగుల్, టీసీఎస్, కాగ్నిజెంట్ వంటి సంస్థలు పెట్టుబడులు పెట్టేందుకు ముందుకు వచ్చాయి.

మరోవైపు విశాఖతో పాటుగా విజయవాడలోనూ లులు షాపింగ్ మాల్ ఏర్పాటు చేయనున్నారు. ఇందుకోసం విజయవాడలో ఇప్పటికే భూమిని కూడా ప్రభుత్వం గుర్తించింది. 4.15 ఎకరాల భూమిని లులు గ్రూపునకు కేటాయించేందుకు సూత్రప్రాయంగా అంగీకారం తెలిపింది. ఇందులో 2.23 లక్షల చదరపు అడుగుల విస్తీర్ణంలో లులు షాపింగ్‌ మాల్‌ ఏర్పాటు చేయనున్నారు. అయితే గుర్తించిన స్థలం ఆర్టీసీ పరిధిలో ఉండటంతో ఆర్టీసీ సంఘాల నుంచి అభ్యంతరాలు వ్యక్తమవుతున్నాయి. ఈ నేపథ్యంలో ఆర్టీసీకి ప్రత్యామ్నాయంగా మరోచోట స్థలాన్ని కేటాయించే ఆలోచన చేస్తున్నారు. అయితే విశాఖలో భూముల కేటాయింపుపై అభ్యంతరాలు లేకపోవటంతో.. లులు మెగా షాపింగ్ మాల్‌కు ఈ నెలలోనే చంద్రబాబు చేతుల మీదుగా శంకుస్థాపన జరగవచ్చని పారిశ్రామిక వర్గాలు చెప్తున్నాయి.