అమెరికాకు వెళ్లడానికి బెడిసికొట్టిన 'డంకీ' ప్లాన్.. 54 మంది ఇండియన్స్ ఇంటికే

అమెరికా అధ్యక్షుడు డొనాల్డ్ ట్రంప్ యంత్రాంగం అక్రమ వలసలపై కఠినచర్యలు తీసుకుంటున్న సంగతి తెలిసిందే. అక్రమంగా వెళ్లే మార్గాలు మూసుకుపోతున్నా, కొంతమంది మాత్రం రిస్క్ చేసి 'డంకీ' రూట్‌ను నమ్ముకుని అమెరికాలోకి వెళ్లే ప్రయత్నం చేస్తున్నారు. అలా, రిస్క్ చేసి అమెరికాకు వెళ్లిన 54 మంది భారతీయులు పట్టుబడ్డారు. అక్రమ మార్గంలో దేశంలోకి ప్రవేశించారనే ఆరోపణలపై ఈ 54 మందిని అగ్రరాజ్యం వెనక్కి పంపించింది. దీంతో వారంతా ఢిల్లీలోని అంతర్జాతీయ విమానాశ్రయానికి చేరగా, పోలీసులు వారికి స్వాగతం పలికి, వారి కుటుంబాలకు అప్పగించారు. వీరిలో అత్యధికులు హర్యానా రాష్ట్రానికి చెందినవారే కావడం గమనార్హం. కర్నాల్, ఖైతాల్, అంబాలా, యమునానగర్, కురుక్షేత్ర, జింద్, సోనీపత్ ప్రాంతాలకు చెందిన ఈ యువకులు డంకీ రూట్ ద్వారా అమెరికా వెళ్లినట్లు పోలీసులు వెల్లడించారు. అమెరికా నుంచి వలసదారులను బహిష్కరించాలనే ట్రంప్ నిర్ణయాన్ని ఆ దేశ సుప్రీంకోర్టు సమర్దించిన విషయం తెలిసిందే.

వాళ్లను ఈ మార్గంలో పంపిన ఏజెంట్లపై మాత్రం ఇప్పటివరకు ఎలాంటి ఫిర్యాదులు అందలేదని పోలీసులు తెలిపారు. అక్రమ మార్గాల్లో విదేశాలకు వెళ్లే ప్రయత్నం చేయవద్దని, అలా చేస్తే కొత్త సమస్యలు కొనితెచ్చుకున్నట్లేనని పోలీసులు గట్టిగా సూచిస్తున్నారు. కాగా, అక్రమవలసదారుల విషయంలో అమెరికా వ్యవహరిస్తున్న తీరుపై పలు విమర్శలు వెల్లువెత్తిన సంగతి తెలిసిందే.

భయంకరమైన 'డంకీ' రూట్?

సాధారణంగా విదేశాలకు అక్రమంగా వెళ్లేందుకు ఎంచుకునే ప్రమాదకర మార్గాన్నే 'డంకీ' రూట్ అని పిలుస్తారు. ఇది పంజాబీ వాడుక భాష నుంచి వచ్చింది, దీని అర్థం 'సరైన ప్రణాళిక లేకుండా ఒకచోటు నుంచి మరోచోటుకు వెళ్లడం. ఈ చీకటి మార్గంలో ప్రయాణం చాలా భయంకరంగా ఉంటుంది. ఏజెంట్లు ముందుగా ఐరో సమాఖ్య ఇచ్చే షెంజెన్ టూరిస్టు వీసా ఇప్పిస్తారు. దీంతో 26 దేశాల్లో తిరిగేందుకు లీగల్ ఎంట్రీ దొరుకుతుంది. ఆ తర్వాత అసలు కథ మొదలవుతుంది. ఈ ఏజెంట్లు నకిలీ డాక్యుమెంట్లు సృష్టించి, భారీ మొత్తంలో డబ్బు వసూలు చేస్తారు.

షిప్‌ కంటైనర్లలో, వాహనాల్లోని రహస్య కంపార్ట్‌మెంట్లలో దాచిపెట్టడం ద్వారా లేదా అతి ప్రమాదకర పరిస్థితుల్లో సరిహద్దులు దాటించడం ద్వారా అక్రమంగా యూకే లేదా అమెరికా వంటి దేశాలకు పంపించేందుకు ప్రయత్నిస్తారు. కెనడా, అమెరికా, యూకేలకు వెళ్లాలని కలలు కనే కొందరు భారతీయులు ఈ రిస్క్ తీసుకుంటున్నారు. ఈ క్రమంలో ప్రాణాలు కూడా పోగొట్టుకున్నవారు ఉన్నారు.చివరికి, ఈ డంకీ రూట్ భారీ నష్టాన్ని మిగల్చడమే కాదు, పరువు కూడా పొతుందని ఈ 54 మంది కథ నిరూపించింది.