కొబ్బరి నీళ్లలో మూడంటే మూడే పదార్థాలు కలిపి తాగితే

మండే ఎండల్లో చెమట బాగా పడుతుంది. ఇలాంటి పరిస్థితుల్లో తగినంత నీరు తాగకపోతే నిర్జలీకరణానికి గురువుతారు. శరీరాన్ని లోపల నుంచి చల్లగా ఉంచడానికి నీటితో పాటు కొబ్బరి నీళ్లు, మజ్జిగ, ఇంట్లో తయారుచేసిన సహజ పానీయాలు తాగవచ్చు. సహజ పదార్థాలతో ఇంట్లో తయారు చేసుకునే డ్రింక్స్ తాగితే వేడి గాలులు, నిర్జలీకరణం, కడుపు నొప్పి వంటి సమస్యల నుంచి రక్షించుకోవచ్చు. ఎండకాలంలో వడగాలుల తీవ్రత ఎక్కువగా ఉంటుంది. అంతేకాకుండా ఒంట్లో వేడి ఎక్కువైపోతుంది. ఇలాంటి పరిస్థితుల్లో హెల్తీ సమ్మర్ డ్రింక్ మీకు మంచి ఆప్షన్. కొబ్బరి నీళ్లలో మూడు పదార్థాల్ని కలిపి తాగితే ఎండకాలంలో ఒంట్లో వేడిని తగ్గించడమే కాకుండా, ఇంకా ఎన్నో లాభాలు ఉంటాయి. హెల్తీ సమ్మర్ డ్రింక్‌ను ఎలా చేసుకోవాలో ఇక్కడ తెలుసుకుందాం.

కొబ్బరి నీళ్లతో కూల్ కూల్ డ్రింక్

కొబ్బరి నీళ్లలో సోంపు, పుదీనా, చియా గింజలు, నల్ల ఉప్పు కలిపి ఇంట్లోనే కొబ్బరి కూలర్ డ్రింక్ తయారు చేసుకోవచ్చు. దీని రెసిపీని పోషకాహార నిపుణురాలు లావ్నీత్ బాత్రా తన ఇన్‌స్టాగ్రామ్ ఖాతాలో పంచుకున్నారు. ఈ వేసవి పానీయం తయారుచేసే పద్ధతిని తెలుసుకుందాం.

కావాల్సిన పదార్థాలు

కొబ్బరి నీళ్లు - 1 గ్లాసు

సోంపు పొడి - 1/2 స్పూన్

పుదీనా ఆకుల పొడి - 1/2 స్పూన్

నానబెట్టిన చియా సీడ్స్ - ఒక టేబుల్ స్పూన్

నల్ల ఉప్పు - 1 చిటికెడు

కోకోనట్ సమ్మర్ కూలర్ రెసిపీ

తయారీ విధానం

ఈ హెల్తీ సమ్మర్ డ్రింక్ తయారు చేయడానికి పెద్దగా కష్టపడాల్సిన పనికూడా లేదు. ముందుగా ఒక గ్లాస్ కొబ్బరి నీళ్లు తీసుకోండి. కొబ్బరి నీళ్లలో సోంపు పొడి, పుదీనా ఆకుల పొడి, నానబెట్టిన చియా సీడ్స్, నల్ల ఉప్పు పైన చెప్పిన కొలతలతో కలపండి. ఈ పదార్థాలన్నీ కొబ్బరి నీళ్లలో బాగా కలిసేలా కలపండి. ఇంకేముంది హెల్తీ అండ్ టేస్టీ సమ్మర్ కూలర్ డ్రింక్ రెడీ అయినట్టే. ఈ డ్రింక్ తాగడం వల్ల ఎన్నో ఆరోగ్య ప్రయోజనాలు ఉంటాయి. అవేంటో తెలుసుకుందాం.

కొబ్బరి నీళ్లతో ప్రయోజనాలు

కొబ్బరి నీళ్లు ఆరోగ్యానికి ఎంతో మేలు చేస్తుంది. కొబ్బరి నీళ్లు సహజంగా తీపిగా, తాజాగా, పోషకాలతో నిండి ఉంటుంది. ఇందులో విటమిన్లు, ఖనిజాలు, ఎలక్ట్రోలైట్లు, యాంటీ ఆక్సిడెంట్లు, పొటాషియం పుష్కలంగా ఉంటాయి. ఇవి శరీరాన్ని హైడ్రేటెడ్‌గా ఉంచడంలో, శక్తిని కాపాడటంలో సాయపడతాయి. శరీరంలో నీటి లోపాన్ని అధిగమించడానికి కొబ్బరి నీరు అద్భుత ఎంపిక. కొబ్బరి నీళ్లలో పొటాషియం అధికంగా ఉంటుంది, ఇది మీ శరీరం నుంచి అదనపు నీటిని, వ్యర్థ పదార్థాలను తొలగిస్తుంది. కొబ్బరి నీళ్లలో యాంటీఆక్సిడెంట్లు కూడా మెండుగా ఉంటాయి, ఇవి కాలేయాన్ని ఆరోగ్యంగా ఉంచుతాయి.

సోంపు గింజల పొడితో ప్రయోజనాలు

​సోంపు.. ఇది రుచి, వాసనకు ఫేమస్. చాలా మంది భోజనం చేసిన తర్వాత సోంపు తింటుంటారు. ఇది నోటి దుర్వాసనను దూరం చేస్తుంది. ఇది మంచి నేచురల్ మౌత్ ఫ్రెషన‌ర్. అంతేకాకుండా ఆహారం సులభంగా జీర్ణమవ్వడానికి సాయపడుతుంది. సోంపులో అనేక పోషకాలు ఉన్నాయి. సోంపులో యాంటీ ఇన్ఫ్లమేటరీ గుణాలు ఉన్నాయి. ఇవి కడుపు సమస్యల్ని తగ్గించడంలో సాయపడతాయి. కడుపులోని చెత్తను బయటకు పంపించడంలో సాయపడుతుంది. సోంపులో యాంటీ ఆక్సిడెంట్లు, విటమిన్ సి పుష్కలంగా ఉన్నాయి. ఇవి ఇమ్యూనిటీ పవర్‌ని పెంచుతాయి. దీంతో.. రోగాలన్ని తట్టుకునే శక్తి వస్తుంది.

పుదీనాతో ప్రయోజనాలు

పుదీనాల్లో మన ఆరోగ్యానికి అవసరమైన ముఖ్యమైన పోషకాలు ప్యాక్‌ చేసి ఉన్నాయి. పుదీనాలో విటమిన్‌ ఏ సమృద్ధిగా ఉంటుంది. ఇది కంటి ఆరోగ్యానికి మేలు చేస్తుంది, దృష్టిని మెరుగుపరుస్తుంది. పుదీనా ఆకుల్లోని విటమిన్‌ సి, రోగనిరోధక శక్తిని పెంచే శక్తివంతమైన యాంటీఆక్సిడెంట్‌గా పనిచేస్తుంది. పుదీనాలో ఐరన్‌, మాంగనీస్‌, ఫోలేట్‌లు సమృద్ధిగా ఉంటాయి. ఇవి జీవక్రియ విధులు, కణాల పెరుగుదలకు తోడ్పడతాయి. శరీరంలోని వేడి తగ్గించడంలో పుదీనా బాగా తోడ్పడుతుంది.

చియా సీడ్స్‌తో లాభాలు

చియా గింజలు శరీరంలో నీటి శాతాన్ని నిర్వహించడానికి, మనల్ని హైడ్రేటెడ్‌గా ఉంచడంలో సాయపడతాయి. చియా విత్తనాలు కూలింగ్ ఏజెంట్‌గా పనిచేస్తాయి. చియా గింజలు అనేక ఇతర ఆరోగ్య ప్రయోజనాలను కూడా కలిగి ఉన్నాయి. చియా సీడ్స్‌లో ఒమేగా-3 ఫ్యాటీ యాసిడ్స్, ఫైబర్, ప్రోటీన్, యాంటీఆక్సిడెంట్లు వంటి పోషకాలు సమృద్ధిగా ఉంటాయి. ఈ పదార్థాలన్నింటినీ కొబ్బరి నీళ్లలో కలిపి తాగడం వల్ల రెట్టింపు ప్రయోజనాలు అందుతాయి.