న్యూఢిల్లీ: ఈ వారం చివరలో న్యూఢిల్లీలో జరగనున్న 18వ బ్రిక్స్ (BRICS) శిఖరాగ్ర సమావేశంలో బహుధ్రువత్వం, సమకాలీన వాస్తవాలకు అనుగుణంగా ఐక్యరాజ్యసమితి భద్రతా మండలితో సహా ప్రపంచ బహుపాక్షిక సంస్థలను సంస్కరించాల్సిన అవసరాన్ని నొక్కిచెప్పనున్నట్లు ఐక్యరాజ్యసమితి సెక్రటరీ జనరల్ ఆంటోనియో గుటెర్రెస్ వెల్లడించారు. సెప్టెంబర్ 12-13 తేదీలలో జరగనున్న ఈ సదస్సులో పాల్గొనేందుకు గుటెర్రెస్ గురువారం భారతదేశానికి బయలుదేరనున్నారు.
‘సమ్మిళిత ప్రపంచ వృద్ధి కోసం భవిష్యత్తును తీర్చిదిద్దడం’ అనే అంశంపై సెప్టెంబర్ 13న జరిగే బహిరంగ సమావేశంలో ఆయన ప్రసంగించనున్నారు. నేటి ఆర్థిక, జనాభా, భౌగోళిక రాజకీయ వాస్తవాలు 1945 నాటివి కావని, బహుధ్రువత్వం ప్రపంచ వ్యవస్థలలో సమతుల్యతను తీసుకువస్తుందని ఆయన నొక్కిచెప్పనున్నట్లు ఐరాస ప్రతినిధి స్టెఫాన్ డుజారిక్ తెలిపారు. అలాగే ఐరాస అత్యున్నత మండలితో పాటు బ్రెటన్ వుడ్స్ వ్యవస్థలో మార్పులు అత్యవసరమని స్పష్టం చేయనున్నారు. భద్రతా మండలిలో శాశ్వత స్థానం కోసం, సమగ్ర సంస్కరణల కోసం భారతదేశం సుదీర్ఘకాలంగా డిమాండ్ చేస్తున్న సంగతి తెలిసిందే.
ఈ పర్యటనలో భాగంగా గుటెర్రెస్ ప్రధానమంత్రి నరేంద్ర మోదీతో పాటు పలువురు ప్రపంచ నేతలతో ద్వైపాక్షిక సమావేశాలు నిర్వహించనున్నారు. 2026 సంవత్సరానికి బ్రిక్స్ అధ్యక్ష బాధ్యతలను వహిస్తున్న భారతదేశం, ఈ కూటమి ఏర్పడి 20 ఏళ్లు పూర్తయిన సందర్భంగా నాలుగోసారి ఛైర్షిప్ను నిర్వర్తిస్తోంది. “స్థితిస్థాపకత, ఆవిష్కరణ, సహకారం మరియు సుస్థిరత కోసం నిర్మాణం” అనే ప్రధాన ఇతివృత్తంతో జరుగుతున్న ఈ సదస్సులో పశ్చిమ ఆసియా సంక్షోభం, ఆర్థిక పరిణామాలు వంటి అనేక అంతర్జాతీయ సవాళ్లపై ప్రపంచ నేతలు విస్తృతంగా చర్చించనున్నారు.
