మౌలిక సదుపాయాలే దేశ సమగ్ర వృద్ధికి చోదకమని ఉద్ఘాటన
వడోదర: 2047 నాటికి భారత్ను వికసిత్ భారత్గా తీర్చిదిద్దే దిశగా మౌలిక సదుపాయాల కల్పనే ప్రధాన చోదక శక్తిగా నిలుస్తుందని ప్రధానమంత్రి నరేంద్ర మోదీ స్పష్టం చేశారు. మంగళవారం గుజరాత్లోని వడోదర మహారాజా సయాజీరావు విశ్వవిద్యాలయం మైదానంలో జరిగిన 'నమో ఫర్ వికసిత్ భారత్' కార్యక్రమంలో పాల్గొన్న ప్రధాని, రూ. 35,000 కోట్లకు పైగా విలువైన పలు అభివృద్ధి ప్రాజెక్టులను ప్రారంభించి, శంకుస్థాపనలు చేశారు.
ఈ సందర్భంగా ప్రధాని మోదీ మాట్లాడుతూ.. 2,800 కిలోమీటర్ల పొడవైన తూర్పు, పశ్చిమ డెడికేటెడ్ ఫ్రైట్ కారిడార్లు (ప్రత్యేక సరుకు రవాణా కారిడార్లు) పూర్తి కావడం భారత రవాణా రంగానికి, వాణిజ్య వ్యవస్థకు కొత్త ఊపిరి పోసిందన్నారు. సరుకు రవాణా మరియు ప్రయాణీకుల రవాణాను వేరు చేయడం వల్ల రైల్వే సమర్థత గణనీయంగా పెరిగిందని, ప్రస్తుతం ఈ మార్గాల్లో రోజూ 430కి పైగా రైళ్లు నడుస్తున్నాయని తెలిపారు. ముంబైలోని జవహర్లాల్ నెహ్రూ పోర్ట్ మరియు వడోదర మధ్య నడిచిన డబుల్-స్టాక్ కంటైనర్ రైలు ఒకే ట్రిప్లో 250కి పైగా ట్రక్కుల సరుకును చేరవేసే సామర్థ్యాన్ని చాటిచెప్పిందని పేర్కొన్నారు. దీనివల్ల ప్రయాణ సమయంతో పాటు పండ్లు, కూరగాయలు వంటి త్వరగా పాడైపోయే వ్యవసాయ ఉత్పత్తులు వేగంగా మార్కెట్లకు చేరుకుంటాయని చెప్పారు.
గుజరాత్, మధ్యప్రదేశ్, మహారాష్ట్రల్లోని మారుమూల, గిరిజన ప్రాంతాలకు రైల్వే అనుసంధానాన్ని విస్తరించామని, రైల్వేల ఆధునీకరణకు రూ. 2.75 లక్షల కోట్లకు పైగా కేటాయించి ఉపాధి అవకాశాలను సృష్టించామని ప్రధాని అన్నారు. భారత తొలి స్వదేశీ సి-295 సైనిక రవాణా విమాన తయారీకి వడోదర కేంద్రంగా మారడాన్ని ఆయన గుర్తుచేశారు. పునరుత్పాదక ఇంధనంలో భాగమైన పీఎం సూర్య ఘర్ ఉచిత విద్యుత్ పథకం ద్వారా గుజరాత్లోని 11 లక్షల కుటుంబాలతో సహా దేశవ్యాప్తంగా 55 లక్షల కుటుంబాలు విద్యుత్ ఉత్పత్తిదారులుగా మారాయని వెల్లడించారు.
ఉపాధి, విద్య రంగాల గురించి ప్రస్తావిస్తూ.. వేగంగా మారుతున్న కాలంలో కేవలం డిగ్రీలు సరిపోవని, యువతకు నిరంతర నైపుణ్యాభివృద్ధి, ఏఐ (ఆర్టిఫిషియల్ ఇంటెలిజెన్స్) శిక్షణ అవసరమని స్పష్టం చేశారు. పోటీ పరీక్షలకు సిద్ధమయ్యే పేద, మధ్యతరగతి యువత కోసం ప్రభుత్వమే ఉచిత ఆన్లైన్ కోచింగ్ బాధ్యతను స్వీకరిస్తుందని ప్రధాని మోదీ ఈ సందర్భంగా కీలక ప్రకటన చేశారు.
