సూర్య ఎంటర్టైన్మెంట్ డెస్క్: భారతీయ చలనచిత్ర చరిత్రలో అత్యంత భారీ ప్రతిష్టాత్మకంగా తెరకెక్కుతున్న పౌరాణిక దృశ్యకావ్యం రామాయణపై తాజాగా ఓ ఆసక్తికరమైన వార్త బాలీవుడ్ వర్గాల్లో చక్కర్లు కొడుతోంది. దర్శకుడు నితీష్ తివారీ తెరకెక్కిస్తున్న ఈ భారీ బడ్జెట్ చిత్రానికి సంబంధించి మేకర్స్ విదేశీ ప్రేక్షకుల కోసం సరికొత్త ప్లాన్ సిద్ధం చేశారు. రణబీర్ కపూర్, సాయి పల్లవి ప్రధాన పాత్రల్లో నటిస్తున్న ఈ పాన్ వరల్డ్ ప్రాజెక్ట్కు సంబంధించి హిందీ మరియు ఇతర భారతీయ భాషల వెర్షన్లతో పాటు ప్రత్యేకంగా ఇంగ్లీష్ వెర్షన్ను రూపొందిస్తున్నారు. అయితే అంతర్జాతీయ ప్రేక్షకుల రుచి, అభిరుచులు మరియు అక్కడి థియేట్రికల్ ఫార్మాట్కు తగినట్లుగా ఇంగ్లీష్ కట్లో కీలకమైన మార్పులు చేస్తున్నట్లు తెలుస్తోంది.
భారతీయ ప్రేక్షకులు మూడు గంటలకు పైగా సాగే సినిమాలను, ముఖ్యంగా కథలో భాగంగా వచ్చే పాటలను ఎంతో ఆస్వాదిస్తారని, కానీ గ్లోబల్ ఆడియెన్స్కు ఆ పద్ధతి భిన్నంగా ఉంటుందని మేకర్స్ భావిస్తున్నారు. ఈ నేపథ్యంలో ఇంగ్లీష్ వెర్షన్లో ఎలాంటి పాటలు లేకుండా కేవలం కథను నడిపించే సన్నివేశాలపైనే పూర్తి దృష్టి పెట్టాలని నిర్ణయించుకున్నట్లు సమాచారం. దీనివల్ల భారతీయ వెర్షన్తో పోలిస్తే ఇంగ్లీష్ ఎడిట్ దాదాపు ముప్పై నిమిషాల వరకు నిడివి తక్కువగా ఉండనుందని, కొన్ని సన్నివేశాలను కూడా మరింత క్రిస్పీగా ట్రిమ్ చేసినట్లు సినీ వర్గాల ద్వారా తెలుస్తోంది.
అయితే దేశీయంగా విడుదలయ్యే హిందీ, తెలుగు తదితర భారతీయ భాషల వెర్షన్లలో మాత్రం పాటలు యథావిధిగా కొనసాగుతాయని, ఇవి చిత్రానికి మరింత భావోద్వేగ బలాన్ని చేకూరుస్తాయని స్పష్టమవుతోంది. కేవలం విదేశీ ప్రేక్షకులను దృష్టిలో పెట్టుకుని మాత్రమే ఈ స్ట్రీమ్లైన్డ్ ఎడిట్ను సిద్ధం చేస్తున్నట్లు తెలుస్తోంది. ప్రపంచవ్యాప్తంగా అగ్రశ్రేణి సాంకేతిక నిపుణుల భాగస్వామ్యంతో రూపుదిద్దుకుంటున్న ఈ దృశ్యకావ్యంపై ఇప్పటికే భారీ అంచనాలు నెలకొని ఉండగా, ఈ తాజా ప్రమోషనల్ వ్యూహం సినిమాను గ్లోబల్ స్థాయిలో ఏ విధంగా నిలబెడుతుందనేది ఆసక్తికరంగా మారింది.
