టాలీవుడ్ వర్గాల్లో ఆసక్తి రేకెత్తిస్తున్న డివోషనల్ యాక్షన్ థ్రిల్లర్ ‘మహేంద్రగిరి వారాహి’. వైవిధ్యమైన కథలతో ప్రేక్షకులను అలరించే హీరో సుమంత్, ఐశ్వర్య రాజేష్ జంటగా నటిస్తున్న ఈ చిత్రంలో స్టార్ బాయ్ సిద్దు జొన్నలగడ్డ కీలక పాత్రలో కనిపించనున్నారు. సంతోష్ జాగర్లపూడి దర్శకత్వం వహించిన ఈ సినిమాను రాజశ్యామల ఎంటర్టైన్మెంట్స్, బ్రిడ్జ్ ఫిలిమ్స్ బ్యానర్లపై కలిపు మధు, లక్ష్మణ్ సంయుక్తంగా అత్యంత భారీ బడ్జెట్తో నిర్మించారు. సెప్టెంబర్ 11న ప్రేక్షకుల ముందుకు రానున్న ఈ సినిమా విశేషాలపై తాజాగా హీరో సుమంత్ మీడియాతో ముచ్చటించి పలు ఆసక్తికర విషయాలను పంచుకున్నారు.
ఈ సినిమా తన కెరీర్లోనే బిగ్గెస్ట్ బడ్జెట్ ప్రాజెక్ట్ అని సుమంత్ తెలిపారు. హిందీ, తమిళ భాషల్లోనూ విడుదలవుతుండటంతో నార్త్ ఆడియన్స్ నుంచి కూడా మంచి స్పందన వస్తోందని చెప్పారు. మూఢనమ్మకాలను ఎక్స్పోజ్ చేసే యూట్యూబర్ పాత్రలో తాను కనిపిస్తానని, వేదాలు, పురాణాలపై దర్శకుడు సంతోష్కు ఉన్న పట్టు ఈ కథకు ప్రధాన బలమని పేర్కొన్నారు. ఇంటర్వెల్, ప్రీ క్లైమాక్స్, క్లైమాక్స్ ఎపిసోడ్స్ ప్రేక్షకులకు గూస్బంప్స్ ఇస్తాయని, విజువల్ ఎఫెక్ట్స్ థియేటర్లలో సరికొత్త అనుభూతిని పంచుతాయని ధీమా వ్యక్తం చేశారు.
ఈ చిత్రంలో సిద్దు జొన్నలగడ్డ చేసిన సీరియస్ పాత్ర సినిమాకే హైలైట్గా నిలుస్తుందని, ఆయనతో వచ్చే సన్నివేశాలు ప్రేక్షకులను విపరీతంగా ఆకట్టుకుంటాయని సుమంత్ వెల్లడించారు. ‘మురారి’ సినిమా ఛాయలు కనిపిస్తున్నప్పటికీ, కథాకథనాలు పూర్తిగా భిన్నంగా ఉంటాయని స్పష్టం చేశారు. అనూప్ రూబెన్స్ అందించిన నేపథ్య సంగీతం సినిమా స్థాయిని మరో మెట్టు ఎక్కిస్తుందని చెప్పారు. వారాహి అమ్మవారి సెంటిమెంట్ తమ సినిమాకు కూడా పాజిటివ్గా మారుతుందనే నమ్మకాన్ని వ్యక్తం చేశారు. అన్ని అంశాలతో పాటు పవర్ఫుల్ యాక్షన్ ఎపిసోడ్స్ ఉన్న ఈ డివోషనల్ థ్రిల్లర్ ప్రేక్షకులకు సరికొత్త సినిమాటిక్ అనుభూతిని అందిస్తుందని చిత్ర యూనిట్ ఆశాభావం వ్యక్తం చేస్తోంది.
