విభిన్నమైన కథలు, విలక్షణమైన పాత్రలతో ప్రేక్షకులను ఆకట్టుకుంటున్న స్టార్ యాక్టర్ ఫహాద్ ఫాజిల్ మరో ఆసక్తికరమైన సినిమాతో ప్రేక్షకుల ముందుకు రాబోతున్నారు. బాహుబలి వంటి సంచలన విజయాన్ని అందించిన ఆర్కా మీడియా వర్క్స్ నిర్మాణ సంస్థతో పాటు షోయింగ్ బిజినెస్ బ్యానర్స్ సంయుక్త నిర్మాణంలో తెరకెక్కుతున్న ఫాంటసీ ఎంటర్టైనర్ ‘డోంట్ ట్రబుల్ ది ట్రబుల్’పై ఇప్పటికే సినీ వర్గాల్లో ఆసక్తి నెలకొంది. ఈ ప్రాజెక్ట్కు సెన్సేషనల్ డైరెక్టర్ ఎస్.ఎస్. రాజమౌళి అనుబంధం ఉండటంతో సినిమాపై అంచనాలు మరింత పెరిగాయి.
‘ప్రేమలు’ సినిమాను డిస్ట్రిబ్యూట్ చేసి ప్రేక్షకుల నుంచి మంచి ఆదరణను అందుకున్న నిర్మాత ఎస్.ఎస్. కార్తికేయ.. ఇప్పుడు ఆర్కా మీడియా వర్క్స్ నిర్మాతలు శోభు యార్లగడ్డ, ప్రసాద్ దేవినేని భాగస్వామ్యంతో ఈ ప్రతిష్టాత్మక చిత్రాన్ని నిర్మిస్తున్నారు. శశాంక్ యేలేటి దర్శకత్వం వహిస్తున్న ఈ సినిమాలో ఫహాద్ ఫాజిల్ ప్రధాన పాత్రలో కనిపించనున్నారు. ఫాంటసీ, ఎంటర్టైన్మెంట్తో పాటు ఆసక్తికరమైన కథాంశాన్ని మేళవిస్తూ తెరకెక్కుతున్న ఈ చిత్రం ప్రేక్షకులకు సరికొత్త అనుభూతిని అందించబోతున్నట్లు చిత్రబృందం చెబుతోంది.
ఇప్పటికే విడుదలైన టీజర్ సినిమాపై క్యూరియాసిటీని పెంచగా, తాజాగా వచ్చిన ‘కేకు వాకు’ వీడియో సాంగ్కు కూడా ఆడియెన్స్ నుంచి మంచి స్పందన లభించింది. టీజర్, సాంగ్తో సినిమాకు సంబంధించిన కంటెంట్పై ఆసక్తి పెరుగుతున్న నేపథ్యంలో మేకర్స్ మరో కీలక అప్డేట్ను ప్రకటించారు. ‘డోంట్ ట్రబుల్ ది ట్రబుల్’ చిత్రాన్ని అక్టోబర్ 2, 2026న ప్రపంచవ్యాప్తంగా గ్రాండ్గా విడుదల చేయనున్నట్లు అధికారికంగా వెల్లడించారు. ఈ సందర్భంగా రిలీజ్ డేట్ను ప్రకటిస్తూ ప్రత్యేక పోస్టర్ను కూడా విడుదల చేశారు.
రిలీజ్ పోస్టర్ సినిమాకు ఉన్న ఫాంటసీ టచ్ను ఆసక్తికరంగా చూపిస్తోంది. పోస్టర్లో ఫహాద్ ఫాజిల్ మెట్లపై కూర్చుని ఉండగా, ఆయన పక్కనే చిన్నారి స్సారా కనిపిస్తోంది. చేతిలో రంగురంగుల మ్యాజిక్ స్టిక్తో ఆమె ఏదో ఇంద్రజాలం చేస్తున్నట్టుగా చూపించారు. అదే సమయంలో ఆకాశం నుంచి డబ్బులు వర్షంలా కురుస్తుండగా, ఆ అద్భుతాన్ని చూసి ఫహాద్ ఫాజిల్ ఆశ్చర్యంతో పాటు ఆనందాన్ని వ్యక్తం చేస్తున్నట్లు పోస్టర్ డిజైన్ చేశారు. ఈ విజువల్ సినిమాకు సంబంధించిన ఫాంటసీ ప్రపంచంపై మరింత ఆసక్తిని కలిగిస్తోంది.
వినోదం, ఫాంటసీ, ఆసక్తికరమైన కథనం కలయికలో తెరకెక్కుతున్న ‘డోంట్ ట్రబుల్ ది ట్రబుల్’ అక్టోబర్ 2న ప్రేక్షకుల ముందుకు రానుంది. ఫహాద్ ఫాజిల్ నటన, శశాంక్ యేలేటి దర్శకత్వం, ఆర్కా మీడియా వర్క్స్ నిర్మాణ విలువలు, ఎస్.ఎస్. కార్తికేయ నిర్మాణ భాగస్వామ్యం ఈ సినిమాకు ప్రత్యేక ఆకర్షణగా నిలుస్తున్నాయి. టీజర్, సాంగ్తో ఆసక్తిని రేకెత్తించిన ఈ చిత్రం థియేటర్లలో ఎలాంటి మ్యాజిక్ చేస్తుందో చూడాలి.
