టాలీవుడ్లో ప్రయోగాత్మక మరియు నేటివిటీ కథలతో తెరకెక్కుతున్న చిత్రాలకు ప్రేక్షకుల నుంచి విపరీతమైన స్పందన లభిస్తోంది. ఈ కోవలోనే సెన్సేషనల్ హిట్ 'రాజు వెడ్స్ రాంబాయి' తర్వాత ప్రముఖ నిర్మాత వేణు ఊడుగుల సమర్పణలో వస్తున్న సరికొత్త చిత్రం ‘చంద్రయాన్’. హిలేరియస్ అడ్వెంచర్ జోనర్ లో తెరకెక్కుతున్న ఈ సినిమాకు సంబంధించిన మోషన్ పోస్టర్ను తాజాగా మేకర్స్ విడుదల చేశారు.
ఈ మోషన్ పోస్టర్ సినిమాపై అంచనాలను ఒక్కసారిగా పెంచేసింది. మందమర్రి అనే పల్లెటూరుకు చెందిన ముగ్గురు యువకులు బైక్ టైర్లు, ప్రెజర్ కుక్కర్, డంబెల్స్ వంటి సాధారణ వస్తువులతో సొంతంగా ఓ రాకెట్ను తయారు చేసి చంద్రమండలానికి పయనం కావడం దీని ప్రధానాంశం. ఈ ముగ్గురు కుర్రాళ్ళు ఈ సాహస యాత్రను ఎందుకు చేపట్టారు? శాస్త్రవేత్తలకే సవాలు విసిరేలా వారు చేసిన ఈ ప్రయత్నం ఫలించిందా లేదా అనే ఆసక్తికరమైన అంశాలతో ఈ సినిమా ఉండబోతున్నట్లు మోషన్ పోస్టర్ స్పష్టం చేస్తోంది.
శివకుమార్ ధీకొండ, స్వప్న ప్రియదర్శిని, రవి శివతేజ, వంశీధర్, లోకేష్, బలగం సత్యనారాయణ తదితరులు ఈ చిత్రంలో కీలక పాత్రలు పోషిస్తున్నారు. సింబ స్క్రీన్ స్టోరీస్ బ్యానర్పై ప్రవీణ్ మొలక ఈ చిత్రాన్ని నిర్మిస్తుండగా, శ్రీనాథ్ చంద్రశేఖర్ దర్శకత్వం వహిస్తున్నారు. హర్ష ప్రవీణ్ సంగీతం అందించిన ఈ మోషన్ పోస్టర్కు కనకవ్వ, శ్రీనిజ భడూరి, లాస్య ఆలపించిన 'రామ రామ రామ ఉయ్యాలో' పాట ప్రత్యేక ఆకర్షణగా నిలిచింది. త్వరలోనే ఈ విభిన్నమైన అడ్వెంచర్ మూవీ గ్రాండ్ థియేట్రికల్ రిలీజ్కు సిద్ధమవుతోంది.
